काठमाडौं । सरकारले थापाथली, गैरीगाउँ, सिनामंगल लगायत काठमाडौं उपत्यकाका विभिन्न क्षेत्रबाट सुकुमवासी बस्ती खाली गराएको छ। मनोहरा क्षेत्रका बस्ती हटाउने क्रम अझै जारी रहेको छ।

हटाइएका सुकुमवासीहरूलाई कीर्तिपुर लगायतका स्थानमा अस्थायी रूपमा व्यवस्थापन गरिएको छ। सम्पर्कमा आएका व्यक्तिहरूलाई ‘स्क्रिनिङ’ प्रक्रियामा सहभागी गराएर अस्थायी सेल्टरमा सारिएको हो।

सम्पर्कमा आएका सुकुमवासीहरूलाई कीर्तिपुर सुन्दरीघाटस्थित राधास्वामी सत्संग आश्रममा राखिएको छ। यसबाहेक, अन्य विस्थापितहरूलाई भक्तपुरको खरिपाटीस्थित विद्युत् तालिम केन्द्र र ललितपुरको बोडेस्थित कृषि विकास बैंक को तालिम केन्द्रमा राख्ने व्यवस्था गरिएको छ।

अस्थायी सेल्टरमा बसेकाहरूलाई काठमाडौं महानगरपालिकाले खानाको व्यवस्था गरेको छ। शनिबार साँझ र आइतबार बिहान बाहिरबाट ल्याइएको प्याकेट खाना वितरण गरिएको थियो भने बिहान चिया र बिस्कुट पनि उपलब्ध गराइएको थियो।

यद्यपि, केही सुकुमवासीहरूले पर्याप्त खाना नपाएको गुनासो गरेका छन्। मध्यान्ह १२ बजे खाना वितरण गरिए पनि एक प्याकेटले पेट नभरिने भन्दै उनीहरूले असन्तुष्टि जनाएका छन्। वर्षौंदेखि बसोबास गर्दै आएको स्थान छाड्नुपरेको पीडासँगै आधारभूत आवश्यकतामा कमी हुँदा उनीहरूको चिन्ता र आक्रोश बढेको देखिन्छ।

२०८३ वैशाख १३ गते आइतवार २१:२३ बजे प्रकाशित