काठमाडौं । भक्तपुरस्थित मनोहरा बस्तीमा निर्माण भएका अवैध घर-टहरा सरकारले आइतबार हटायो । त्यसक्रममा बस्तीभित्र रहेको मनोहर चर्च पनि भत्काइएपछि क्रिस्चियन धर्मावलम्बीहरू असन्तुष्ट बनेका छन् । चर्चका लागि अर्को ठाउँ दिनुपर्ने उनीहरूको माग छ ।

नेपाल प्रेसको सम्पर्कमा आएका मनोहर भजन मण्डल (चर्च) का सचिव मुक्तिराज राईले क्रिस्चियन धर्मावलम्बीको धार्मिक संवेदनशीलता माथि प्रहार भएको बताए । उनले भने, ‘चर्च भत्काएपछि जाने ठाउँको टुंगो दिनुपर्थ्यो ।’

आइतबार भत्काइएको मनोहरा बस्तीका ४५ प्रतिशत बासिन्दा क्रीस्चियन धर्म मान्ने उनको दावी छ । चर्चमा नियमित आवतजावत गर्ने ३ सय धर्मावलम्बी अब कहाँ जाने भन्ने प्रश्न उठेको उनले बताए ।

‘अघिल्लो दिन माइकिङ भयो, भोलिपल्ट भत्काइयो’, राई भन्छन्, ‘त्यहाँका बासिन्दालाई त अन्यत्र राख्ने भनिएको छ, तर धार्मिक प्रतिष्ठानको कुरा के हुन्छ ?’

चर्च भत्किने सूचना पाएपछि राईले त्यहाँका सबै सामान ललितपुर, इमाडोलस्थित आफ्नै घरमा राखेको बताए ।

उनको भनाइ यस्तो छः

सम्माननीय प्रधानमन्त्रीज्यूले आफ्नो पद बहाली गर्नुहुँदा शंख फुकेर मन्त्रोच्चारण गर्नुभयो । हामी उहाँको धर्म र धार्मिक आस्थाको सम्मान गर्छौं । हामीलाई पनि हाम्रो धर्म त्यस्तै प्यारो छ । तर, हामी क्रिस्चियनलाई कौडीको भाउ पनि दिनु भएन । हामीलाई बोलाएको भए, अथवा कुरा गर्नुपर्ने मान्छे तोकेको भए हामी कुरा गर्न तयार थियौँ ।

चर्च भएको जमिन अतिक्रमित स्थान थियो, सरकारले खाली गरायो भन्ने कुरामा हामी सहमत भयौँ, त्यसैले सामान सारिएको छ । तर, चर्च भनेको व्यक्ति होइन । एउटा धार्मिक प्रतिष्ठान हो । देशका लाखौँ जनता यो धर्ममा लागेका छन् । यो क्रिस्चियन समुदायमाथिको आक्रमण हो । सम्माननीय प्रधानमन्त्री बालेन्द्र शाहज्यूलाई पाप-धर्मको ख्याल छ भने तुरुन्तै हाम्रा धार्मिक प्रतिष्ठानको समयोचित व्यवस्थापन गर्नुपर्छ । नत्र, उहाँलाई प्रभुको श्राप लाग्छ ।

२०८३ वैशाख १३ गते आइतवार २१:१६ बजे प्रकाशित