काठमाडौँ । नेकपा (माओवादी केन्द्र) का सांसद वर्षमान पुनले प्रधानमन्त्री स्वयं त्रिभुवन विश्वविद्यालयको कुलपति रहेको स्मरण गराउँदै सिनेट बैठक अविलम्ब बोलाउन ध्यानाकर्षण गराएका छन् ।

प्रतिनिधिसभाको मंगलबारको बैठकमा बोल्दै उपमहासचिव पुनले बैठक स्थगित गरिएकोप्रति आपत्ति जनाउँदै तत्काल बैठक राख्न सरकारको ध्यानाकर्षण गराएका हुन् ।

उनले भने, ‘नेपालकै सबैभन्दा पुरानो त्रिभुवन विश्वविद्यालयको कुलपति सम्माननीय प्रधानमन्त्रीज्यू हुनुहुन्छ। यसै हप्ता बोलाइएको सिनेटको बैठक आकस्मिक रूपमा स्थगित गरियो। गत वर्ष पनि यस्तै प्रकारको घटना घटेको थियो। तत्कालीन भिसीले सरकारको असहयोगका कारणले आफूले राजीनामा दिएको अनौपचारिक टिप्पणी पनि आएका छन्। म सभामुखमार्फत सरकारको ध्यानाकर्षण गराउन चाहन्छु— टियु सिनेटको बैठक अविलम्ब राखियोस्, शैक्षिक क्यालेन्डर बनाइयोस् र लाखौँ युवाहरूको शैक्षिक गुणस्तर सुधार गर्दै भविष्य सुनिश्चित गर्नेतर्फ सरकारको ध्यानाकर्षण गराउँछु।’

२०८२ असार २४ गते मंगलवार १७:२१ बजे प्रकाशित