काठमाडौं । जेनजी आन्दोलन चरम उकालो लागेको बेला भदौ २४ गते सर्वोच्च अदालत परिसरमा भएको आगजनी र हतियार लुटपाटप्रकरणले अहिले राजनीतिक तथा सुरक्षागत वृत्तमा गम्भीर बहस सिर्जना गरेको छ ।

उक्त घटनामा संलग्न भएको आरोपमा प्रहरीले चारजनालाई पक्राउ गरेको हो । पक्राउ परेका व्यक्तिहरूमा सम्राट परियार, एलेक्स पराजुली, ब्राउन श्रेष्ठ र ज्योती थापा घताने रहेका छन् ।

प्रहरीले सार्वजनिक गरेको प्रारम्भिक अनुसन्धान प्रतिवेदनअनुसार, घटनाका अधिकांश अभियुक्तहरू भीडको आवेग र उक्साहटमा परेर संवैधानिक न्यायालयमाथि आक्रमणमा उत्रिएको बताएका छन् । तर, आरोपी ज्योती थापा घतानाको बयान भने अरूभन्दा फरक रहेको छ । उनका अनुसार सर्वोच्च अदालतले पछिल्ला महिनादेखि “राजनीतिक आस्थाका आधारमा छानीछानी फैसला गर्न थालेको” महसुस भएपछि “संस्थागत सुधार र पुनर्संरचना अनिवार्य छ” भन्ने मान्यताले आफूले आगो लगाउने समूहमा सहभागी भएको बताएकी छन् ।

प्रहरीका अनुसार सम्राट परियारको आपराधिक पृष्ठभूमि समेत खुलेको छ । उनीमाथि यसअघि नै ठगी र बैंकिङ कसुरसँग सम्बन्धित मुद्दाहरू दर्ता रहेका थिए, जसले उनको भूमिकाप्रति थप प्रश्न उठाएको छ । त्यस्तै, एलेक्स पराजुली र ब्राउन श्रेष्ठले घटनाको दौरान प्रहरीले बोकिरहेको हतियार लुटेर सर्वोच्चभित्र प्रदर्शनसमेत गरेको अनुसन्धानले देखाएको छ ।

तर, लुटिएको हतियार भने अहिलेसम्म प्रहरीले फेला पार्न सकेको छैन । अभियुक्तहरूले उक्त हतियार सेनालाई बुझाइसकेको दाबी गरे पनि प्रमाणित हुन सकेको छैन । जिल्ला प्रहरी परिसर काठमाडौंका प्रवक्ता एसपी पवनकुमार भट्टराईले हतियारको वास्तविक अवस्था, अन्य संलग्न व्यक्तिहरूको पहिचान तथा सम्भावित योजनाबारे अनुसन्धान तीव्र पारिएको जानकारी दिए ।

प्रहरीका अनुसार प्रारम्भिक तथ्यहरू हेर्दा सिंहदरबारमा आगजनी गर्ने योजना बनाइरहेको समूह नै त्यस दिन सर्वोच्चतर्फ डाइभर्ट भएको देखिन्छ । यसले घटनाको स्वरूपलाई अझ गम्भीर बनाएको र ‘आन्दोलनको नाममा योजनाबद्ध विध्वंसात्मक गतिविधि भइरहेको’ संकेत दिएको अधिकारीहरूको बुझाइ छ ।

उक्त प्रकरणका थप आयाम, योजनाकार तथा सम्भावित राजनीतिक जडबारे अनुसन्धान जारी छ ।

२०८२ मंसिर १८ गते बिहीवार १७:२३ बजे प्रकाशित