विराटनगर । इलामको सूर्योदय नगरपालिकाकी एक महिलाको कोरोना सङ्क्रमणका कारण मृत्यु भएको छ । उनको विराटनगरस्थित नोबेल मेडिकल कलेजमा उपचारको क्रममा मंगलबार मृत्यु भएको हो ।

संक्रमित ४० वर्षीया ती महिला इलामको सूर्योदय नगरपालिकाकी भएको र उनको उपचारको क्रममा  विराटनगरस्थित नोबेल मेडिकल कलेजमा मंगलबार बिहान मृत्यु भएको हो । अस्पताल स्रोतका अनुसार, उनी बाहिरबाटै संक्रमण पुष्टि भएर उपचारका लागि आएको र अवस्था अन्तिम रहेकाले उपचार प्रभावकारी हुन नसकेपछि मृत्यु भएको हो । उनीमा हेपाटाइटिस समेत देखिएको थियो ।

एक सातादेखि श्वास फेर्न अप्ठेरो भएपछि उनलाई उपचारका लागि भर्ना गरिएको थियो ।

यद्यपि प्रदेश सरकारको स्वास्थ्य मन्त्रालयले भने उनको मृत्युबारे अनुसन्धान भइरहेकाले तत्काल केही जानकारी दिन नसक्ने बताएको छ । मन्त्रालयका जनस्वास्थ्य अधिकृत लक्ष्मण खरेलले आफूहरूमा मृत्युबारे खबर आएको र सोबारे अनुसन्धान सुरु गरेको बताए । अनुसन्धानपछि आधिकारिक जानकारी दिने उनको भनाइ थियो ।

कोशी सरकारका अनुसार, झापाका ४, मोरङका २ र इलामका एक जना संक्रमितको उपचार जारी छ ।

२०८२ असार १० गते मंगलवार १७:१२ बजे प्रकाशित