काठमाडौं । अर्थमन्त्री डा. स्वर्णिम वाग्लेले सरकारले आगामी आर्थिक वर्षको बजेट समता, सामाजिक न्याय र समन्यायिक समृद्धिलाई केन्द्रमा राखेर ल्याएको दाबी गरेका छन्।

बिहीबार प्रतिनिधिसभाको बैठकमा सांसदहरूले उठाएका प्रश्नको जवाफ दिँदै उनले बजेट संविधानको मर्मविपरीत रहेको विपक्षी दलहरूको आरोप अस्वीकार गरे। बजेटमा आर्थिक वृद्धि र समानतालाई सन्तुलित रूपमा अघि बढाउने नीति अवलम्बन गरिएको उनको भनाइ थियो।

अर्थमन्त्री वाग्लेले सरकारले समन्यायिक समुन्नति र समृद्धिलाई मुख्य लक्ष्य बनाएर बजेट तर्जुमा गरेको उल्लेख गरे। बजेटमा ‘समाजवाद’ शब्द स्पष्ट रूपमा उल्लेख नभए पनि समताको एजेन्डालाई व्यवहारमा कार्यान्वयन गर्ने प्रयास गरिएको उनले बताए।

सरकार जनतासँग गरेका प्रतिबद्धता र निर्वाचनमार्फत अनुमोदित एजेन्डाप्रति दृढ रहेको उल्लेख गर्दै उनले नीति तथा कार्यक्रम, बजेटका सिद्धान्त र प्राथमिकता तथा बजेटबीच उच्च स्तरको तालमेल रहेको दाबी गरे।

“पाँच वर्षका लागि हाम्रो अर्जुनदृष्टि भनेको हामीले जनतासँग गरेको वाचा र जनताले अनुमोदन गरेको एजेन्डा हो। त्यसप्रति पूर्ण रूपमा वफादार रहेर कार्यक्रमहरू अघि बढाएका छौँ,” उनले भने, “शासकीय सुधारका १०० वटा कार्यक्रम, नीति तथा कार्यक्रम, बजेटका सिद्धान्त र प्राथमिकता तथा बजेटबीच अभूतपूर्व सङ्गति छ।”

नेपालको विगतको राजनीतिक अभ्यास वामपन्थी विचारबाट प्रभावित रहेको उल्लेख गर्दै उनले त्यसबाट प्रेरणा लिइए पनि बजेट संविधानविपरीत नभएको स्पष्ट पारे।

“संविधानको खिलाफमा बजेट आएको भन्ने आरोप पूर्ण रूपमा गलत हो। हामीले समतालाई केन्द्रबिन्दुमा राखेका छौँ। आर्थिक वृद्धिसँगै समतासहितको विकास, समन्यायिक समुन्नति र समृद्धिको अवधारणालाई अघि सारेका छौँ,” उनले भने।

उनले विपक्षी दलहरूलाई आफ्नो राजनीतिक एजेन्डाअनुसारको बजेट नआएको भन्दै असन्तुष्टि व्यक्त गर्ने अधिकार रहेको पनि बताए।

आरोप लगाउनेतर्फ संकेत गर्दै उनले उनीहरूका विषयमा पनि भविष्यमा तथ्यहरू सार्वजनिक हुने चेतावनी दिए।

“यो नैतिक आँट र उचाइ मप्रति औँला ठड्याउनेहरूमा पनि प्राप्त होस्। तपाईँका काण्डबारे हामी अनभिज्ञ छैनौँ, ती पनि खुल्नेछन्,” वाग्लेले भने।

२०८३ जेठ २८ गते बिहीवार १७:३५ बजे प्रकाशित