पाकिस्तानी सञ्चारमाध्यम डन का अनुसार हालसम्म फेला परेका शवमध्ये ओमानकी नधिरा अहमद अब्दुल्लाह अल हार्थी र नेपालका पुरबहादुर गुरुङको पहिचान भएको छ। अन्य दुई शवको औपचारिक पहिचान सार्वजनिक गरिएको छैन।

बेपत्ता हुनेमा नेपालका निर्मल पुर्जा, किली पेम्बा शेर्पा, निमा शेर्पा, नवाङ थिन्दु शेर्पा र ग्यालु शेर्पा रहेका छन्। उनीहरूसँगै एक विदेशी आरोही पनि सम्पर्कविहीन छन्।

अल जजिराले गिल्गित–बाल्टिस्तान पर्यटन विभागका उपनिर्देशक साजिद हुसेनलाई उद्धृत गर्दै जनाएअनुसार उद्धार टोलीले दुर्गम र जटिल क्षेत्रमा बेपत्ता आरोहीहरूको खोजीलाई निरन्तरता दिएको छ। जिपिएस तथ्यांकका आधारमा हिमपहिरोले टोलीलाई करिब एक हजार मिटर तलसम्म बगाएको अनुमान गरिएको छ।

बेपत्ता आरोहीको खोजी तथा उद्धारका लागि पाकिस्तान सेनाका दुईवटा हेलिकोप्टरसहित विशेष उद्धार टोली परिचालन गरिएको छ। प्रतिकूल मौसमका कारण उद्धार कार्य चुनौतीपूर्ण बनेको अधिकारीहरूले बताएका छन्।

गिल्गित–बाल्टिस्तानका मुख्यमन्त्री अमजद हुसेन र पर्यटनमन्त्री नायकनाम करिमले घटनाप्रति दुःख व्यक्त गर्दै उपलब्ध सबै स्रोत–साधन परिचालन गरी उद्धार अभियानलाई तीव्र बनाउन सम्बन्धित निकायलाई निर्देशन दिएका छन्।