काठमाडौं । राष्ट्रिय स्वतन्त्र पार्टीकी सांसद सुमना श्रेष्ठ प्रहरीमाथि अभद्र व्यवहार गरेको आरोपमा पक्राउ परेकी आशिका तामाङलाई भेट्न पुगेकी छन् । बिहीबार दिउँसो श्रेष्ठ सामाजिक सञ्जालमा भाइरल आशिकालाई भेट्न भक्तपुरको जगातीस्थित प्रहरी बृत्त पुगेकी हुन् ।

उनले आशिकाको तरिका ठिक नभए पनि उनले आवाज उठाएको विषयहरु आम नागरिकको तबरबाट ठिक रहेको बताएकी छन् ।

आशिकालाई भेटेपछि सामाजिक सञ्जालमा लेख्दै सुमनाले भनेकी छन्, ‘उहाँको तरिका अराजक छ, त्यसमा असहमति हुँदा पनि त्यसमा आम मानिसको आक्रोश प्रतिबिम्वित भएको देख्छु । अभद्र व्यवहारमा अझै के अनुसन्धान गर्न बाँकी छ, जुन अहिले सम्म हुन सकेको छैन, सबै वृत्तान्तको भिडियो आफैले पोस्ट गरेकी छिन् तरु यो विभिन्न जिल्लामा जाहेरी दिने को हो, अरु जाहेरीमा पनि यही रफ्तारमा कारवाही हुन्छ?’

त्यस्तै उनले दल निकटका मान्छेहरु पक्राउ पर्ने कुरा मात्र अघि आउँदा पनि पहुँचका आधारमा उन्मुक्ति दिइने टिप्पणी गरिन् । साथै राज्यले शक्तिकेन्द्रसम्म पहुँच नभएकाहरुलाई मात्रै पेल्ने गरेको समेत बताइन् ।

‘अहिले आशिकाजीको सट्टा कुनै दल निकट कोहीलाई प्रकाउ गर्ने कुरा मात्र उठेको भए के भइसक्थ्यो हामीले नभोगेको हैन । शक्तिकेन्द्रसम्म पहुँच नभएकोलाई मात्र पेल्ने नियत भो,’ ‘राज्यसँग अपार शक्ति छ, शक्तिशालीले संयमित हुनु पर्दछ । राज्यले अभिभाकत्व लिनुपर्ने ठाउँमा– अस्ति चितवनमा युवकलाई निर्घात कुट्नु र अहिले आशिकाजीलाई मानसिक यातना दिनुमा समानता छ – राज्यको अनावश्यक बल प्रयोग,’ उनले भनेकी छन् ।

प्रहरीमाथि अभद्र व्यवहार गरेको भन्दै आशिकालाई गत माघ २ गते पक्राउ गरिएको थियो । उनलाई काठमाडौं उपत्यकाका तीनै जिल्लाका विभिन्न कार्यालयहरुमा राखेर अनुसन्धान भइरहेको छ ।

२०८१ माघ १७ गते बिहीवार १६:०९ बजे प्रकाशित