काठमाडौं । गृहमन्त्री ओमप्रकाश अर्यालले निर्वाचन आयोगको भ्रमण गरी निर्वाचन सुरक्षा र आगामी प्रतिनिधिसभा निर्वाचनको तयारीका विषयमा छलफल गरेका छन्।

आगामी फागुन २१ गते हुने प्रतिनिधिसभा निर्वाचनको तयारीबारे जानकारी लिन आयोग पुगेका गृहमन्त्री अर्यालले शान्तिसुरक्षा अवस्था र गृह मन्त्रालयले गरिरहेका तयारीबारे कार्यवाहक प्रमुख निर्वाचन आयुक्त रामप्रसाद भण्डारी, सचिव कृष्णबहादुर राउतलगायत उच्च अधिकारीहरूसँग छलफल गरेका हुन्।

सो अवसरमा गृहमन्त्री अर्यालले आयोगमा सञ्चालनमा रहेको संयुक्त निर्वाचन सञ्चालन केन्द्रको पनि अवलोकन गरेका थिए।

कार्यवाहक प्रमुख आयुक्त भण्डारीले हाल फागुन ३ गतेसम्म सञ्चालन भइरहेका निर्वाचनसम्बन्धी कार्यक्रमहरू र फागुन ४ गतेपछि सुरु हुने निर्वाचन प्रचारप्रसार कार्यक्रमका लागि आवश्यक सुरक्षा प्रबन्धबारे गृह मन्त्रालयले गर्नुपर्ने कामका विषयमा जानकारी गराएका थिए।

२०८२ माघ २७ गते मंगलवार १७:०६ बजे प्रकाशित