राप्रपाको ‘संकल्प पत्र’ सार्वजनिक : राजसंस्थासहित दुई तहको शासन प्रणालीको प्रस्ताव
काठमाडौं – राष्ट्रिय प्रजातन्त्र पार्टी (राप्रपा) ले आसन्न प्रतिनिधि सभा निर्वाचनका लागि आफ्नो चुनावी घोषणापत्र सार्वजनिक गरेको छ।
शनिबार पार्टी केन्द्रीय कार्यालयमा आयोजित कार्यक्रममा अध्यक्ष राजेन्द्र लिङ्देनले घोषणापत्र वाचन गर्दै सार्वजनिक गरेका हुन्। राप्रपाले आफ्नो घोषणापत्रलाई ‘संकल्प पत्र’ नाम दिएको छ।
घोषणापत्रमा पार्टीले आगामी गन्तव्यका रूपमा ‘सबल, समृद्ध र सम्मुनत नेपाल–पृथ्वी पथ’ लाई अघि सारेको छ। साथै, शासकीय स्वरूपबारे स्पष्ट धारणा राख्दै अभिभावकीय संस्थाको रूपमा राजसंस्था हुनुपर्ने प्रस्ताव गरेको छ।
राप्रपाले प्रदेश संरचना खारेज गरी केन्द्र र बलियो स्थानीय तहसहित दुई तहको शासकीय प्रणाली स्थापना गर्ने उल्लेख गरेको छ। त्यस्तै, स्थानीय तहलाई गैरदलीय बनाउने अवधारणा पनि घोषणापत्रमा समेटिएको छ।
यसका अतिरिक्त जलस्रोत, पर्यटन, कृषि, सूचना प्रविधि, सुशासन तथा आर्थिक समृद्धिलगायतका विषयलाई प्राथमिकताका साथ समावेश गरिएको छ।
राप्रपाले आफ्नो ‘संकल्प पत्र’ मार्फत राजनीतिक संरचना पुनर्संरचनादेखि आर्थिक तथा सामाजिक विकाससम्मका विषयमा स्पष्ट दिशा प्रस्तुत गरेको जनाएको छ।
२०८२ फागुन २ गते शनिवार १७:२१ बजे प्रकाशित
