काठमाडौँ । फागुन २१ मा हुने प्रतिनिधिसभा सदस्य निर्वाचनअघि नेपाल–भारत र नेपाल–चीन सीमाना मतदान हुनुभन्दा ७२ घण्टा अगावै सिल गर्ने निर्णय गरिएको छ। मंगलबार निर्वाचन आयोगमा बसेको उच्चस्तरीय निर्वाचन सुरक्षा समितिको बैठकले मतदानअघि सीमामा आवागमन बन्द गर्ने निर्णय गरेको हो।

बैठकमा सहभागी आयोगका एक उच्च अधिकृतका अनुसार, सीमाना बन्द गर्ने निर्णयले मतदानको सुरक्षामा सहयोग पुग्नेछ।

मतदानअघि मादक पदार्थको बिक्री वितरणमा रोक लगाउने विषयमा पनि छलफल भएको छ। आयोगले यसबारे समय तोकेर औपचारिक विज्ञप्ति जारी गर्ने जनाएको छ।

फागुन १९ मा पर्ने तराईको होली पर्व र जनकपुरमा हुने माध्यमिकी परिक्रमा मेलाको व्यवस्थापनबारे पनि छलफल भएको छ। भारतको सितमढीबाट हजारौँ श्रद्धालु जानकी मन्दिर पुग्ने परम्परा रहेकोले सुरक्षा र आवागमन व्यवस्थापन कसरी गर्ने भन्ने विषय उठाइएको छ। मौन अवधिमा होली पर्व परेको कारण विशेष व्यवस्थापन आवश्यक रहेको बैठकमा भनिएको छ।

भारतीय नम्बर प्लेटका सवारीसाधन सञ्चालनमा रोक लगाउने विषयमा पनि छलफल भएको छ। विदेशी नम्बर प्लेटको सवारी कहिलेदेखि रोक्ने भन्ने निर्णय अन्तत: निर्वाचन आयोगको अधिकारमा रहेको छ।

हिमाली जिल्लामा भइरहेको हिमपातका कारण सुरक्षाकर्मी र कर्मचारीलाई ‘लेक लाग्ने’ चुनौती रहेकाले मतपेटिका र निर्वाचन सामग्री कसरी सुरक्षित रूपमा ढुवानी गर्ने भन्नेबारे पनि छलफल भएको छ।

निर्वाचनलाई निष्पक्ष, सुरक्षित र व्यवस्थित बनाउन आयोगले सुरक्षाका विभिन्न पक्षमा समन्वय गर्दै तयारी अघि बढाएको जनाएको छ।

बैठकमा कार्यवाहक प्रमुख निर्वाचन आयुक्त रामप्रसाद भण्डारी, निर्वाचन आयोगका सचिव कृष्ण बहादुर राउत, नेपाल प्रहरीका आईजीपी दान बहादुर कार्की, सशस्त्र प्रहरीका आईजी राजु अर्याल, राष्ट्रिय अनुसन्धान विभागका प्रमुख, नेपाली सेनाका प्रतिनिधिहरु सहभागी भएका थिए ।

२०८२ फागुन १२ गते मंगलवार १६:५९ बजे प्रकाशित