यूएईमा इरानको ड्रोन आक्रमणमा १५ नेपाली घाइते, अधिकांश काममा फर्किए
काठमाडौं । संयुक्त अरब इमिरेट्स (यूएई) मा इरानले गरेको मिसाइल तथा ड्रोन आक्रमणमा परेर हालसम्म १५ जना नेपाली घाइते भएका छन्। तीमध्ये १४ जना उपचारपछि आफ्नो काममा फर्किसकेको परराष्ट्र मन्त्रालयले जनाएको छ।

बुधबार परराष्ट्र मन्त्रालयले आयोजना गरेको पत्रकार सम्मेलनमा मन्त्रालयका सहसचिव रामजी खड्काले इरानले प्रहार गरेको मिसाइल तथा ड्रोन आक्रमणका क्रममा १५ नेपाली सामान्य घाइते भएको जानकारी दिए। उनका अनुसार घाइतेमध्ये एक जना अझै उपचाररत रहेका छन् र उनको अवस्था पनि सामान्य रहेको छ।

हाल इजरायल, अमेरिका र इरानबीच आक्रमण तथा प्रत्याक्रमणको अवस्था जारी छ। इरानले खाडी तथा पश्चिम एसियाका विभिन्न देशहरूमा रहेका अमेरिकी सैन्य बेसक्याम्पहरूलाई लक्षित गर्दै ड्रोन तथा मिसाइल आक्रमण गर्दै आएको बताइएको छ।

यसैबीच, ड्रोन आक्रमणकै क्रममा गोरखा जिल्लाका विवेक श्रेष्ठको यूएईमा मृत्यु भएको थियो। उनको शव नेपाल ल्याएर अन्त्येष्टि समेत गरिसकिएको छ। परराष्ट्र मन्त्रालयका अनुसार उनको क्षतिपूर्तिका लागि यूएईस्थित नेपाली दूतावासमार्फत पहल भइरहेको छ।

मन्त्रालयले यूएई तथा अन्य क्षेत्रमा रहेका नेपालीहरू भने हाल सुरक्षित रहेको जनाएको छ।

२०८२ फागुन २७ गते बुधवार १८:०७ बजे प्रकाशित