रास्वपा महाधिवेशनका लागि झण्डै २ करोड रुपैयाँ संकलन
काठमाडौं। राष्ट्रिय स्वतन्त्र पार्टी (रास्वपा)को प्रथम महाधिवेशनमा सहभागी हुन करिब ४ हजार प्रतिनिधिले सहभागिता शुल्क बुझाएका छन्।
रास्वपाले प्रत्येक प्रतिनिधिका लागि ५ हजार रुपैयाँ सहभागिता शुल्क निर्धारण गरेको छ। महाधिवेशनको पूर्वसन्ध्यामा उपसमिति संयोजक लिमा अधिकारीले यसबारे केन्द्रीय समिति बैठकलाई जानकारी गराएकी हुन्।
पार्टीका प्रवक्ता मनिष झाका अनुसार हालसम्म ३ हजार ९९० प्रतिनिधिले सहभागिता शुल्क बुझाइसकेका छन्।
यसअनुसार प्रतिनिधिहरूबाट मात्रै कुल १ करोड ९९ लाख ५० हजार रुपैयाँ संकलन भएको छ।
उक्त विवरण निर्वाचन आयोगलाई बुझाइसकिएको र हाल रुजु गर्ने प्रक्रिया जारी रहेको जानकारी पनि बैठकमा दिइएको छ।
रास्वपाको प्रथम महाधिवेशन आइतबारदेखि चितवनमा सुरु हुँदैछ। महाधिवेशनमा देशभरबाट प्रतिनिधि, नेता–कार्यकर्ता तथा पर्यवेक्षकहरूको सहभागिता रहनेछ।
२०८३ असार ६ गते शनिवार १७:४२ बजे प्रकाशित
