काठमाडौं । नेपाली नागरिकलाई नक्कली भुटानी शरणार्थी बनाएर अमेरिका पठाइएको प्रकरणसम्बन्धी अदालतमा विचाराधीन मुद्दामा बुधबारदेखि अन्तिम बहस सुरु भएको छ। फैसला चरणमा पुगेको उक्त मुद्दामा काठमाडौं जिल्ला अदालतका न्यायाधीश तेज खड्काको इजलासमा दैनिक सुनुवाइ भइरहेको छ।

बहसका क्रममा जाहेरवालाको तर्फबाट उपस्थित अधिवक्ताले केही उच्च राजनीतिक व्यक्तित्वको नाम जोड्दै उनीहरूलाई बयानका लागि झिकाउन माग गरेका छन्।

अधिवक्ता स्वागत नेपालले एमाले अध्यक्ष केपी शर्मा ओली, उनका स्वकीय सचिव राजेश बज्राचार्य, अख्तियार दुरुपयोग अनुसन्धान आयोगका प्रमुख प्रेमकुमार राई, एमाले वरिष्ठ उपाध्यक्ष रामबहादुर थापा ‘बादल’, कांग्रेस नेतृ आरजू राणा र मञ्जु खाँडलाई बयानका लागि झिकाउनुपर्ने माग गरे।

उनले मुद्दासँग सम्बन्धित अडियो, भिडियो तथा अन्य प्रमाणहरू पेश भइसकेको दाबी गर्दै ती व्यक्तिहरूमाथि अनुसन्धान नगरी मुद्दाको निष्कर्षमा पुग्न नसकिने जिकिर गरे।

‘उहाँहरूको नाममा भएका लेनदेनसँग सम्बन्धित अडियो, भिडियो र अन्य प्रमाणहरू अदालतमा पेश भएका छन्। पक्राउ गरी बयान नलिईकन मुद्दाको निष्पक्ष फैसला हुन सक्दैन,’ अधिवक्ता नेपालको भनाइ थियो।

उनको मागपछि प्रतिवादी पक्षका कानुन व्यवसायीहरूले कडा आपत्ति जनाएका थिए। अधिवक्ता धर्मलाल रेग्मीले असम्बन्धित व्यक्तिहरूको नाम लिएर मानमर्दन गर्ने प्रयास गरिएको भन्दै विरोध जनाए। उनले मुद्दाको फैसला अनावश्यक रूपमा लम्ब्याउन नहुने पनि बताए।

यसैबीच, जाहेरवालाकै तर्फबाट अधिवक्ता ध्रुवलाल श्रेष्ठले मुद्दाका अभियुक्तहरूको सम्पत्ति रोक्का नगरिएको विषय उठाएका थिए। उनले यस्ता प्रकृतिका मुद्दामा प्रारम्भिक चरणमै सम्पत्ति रोक्का गर्ने अभ्यास रहेको उल्लेख गर्दै यस प्रकरणमा त्यसो नगरिनुको कारणबारे प्रश्न उठाए।

हाल सरकारी वकिलहरूले बहस गरिरहेका छन्। जाहेरवाला पक्षको मागअनुसार थप व्यक्तिलाई बयानका लागि झिकाउने आदेश इजलासबाट नआएमा मुद्दाको फैसला छिट्टै आउने सम्भावना रहेको छ।

२०८३ जेठ २८ गते बिहीवार १७:४० बजे प्रकाशित