काठमाडौं। राष्ट्रिय भूमि समस्या समाधान समितिले पछिल्लो दुई महिनामा ९७ परिवारलाई जग्गाधनी पुर्जा वितरण गरेको जनाएको छ। समितिका अनुसार जेठ २० देखि साउन १६ गतेसम्म भूमिहीन दलित, भूमिहीन सुकुमवासी र अव्यवस्थित बसोबासी परिवारलाई पुर्जा वितरण गरिएको हो।

वितरित पुर्जामध्ये ६ वटा भूमिहीन दलित, ५८ वटा भूमिहीन सुकुमवासी र ३३ वटा अव्यवस्थित बसोबासी परिवारका नाममा रहेका छन्।

यस अवधिमा झापाको बुद्धशान्ति नगरपालिका–४, अर्जुनधारा नगरपालिका–११ र कन्काई गाउँपालिका–४ का लाभग्राहीलाई जग्गाधनी पुर्जा प्रदान गरिएको समितिले जनाएको छ।

त्यस्तै, बर्दियाको बढैयाताल गाउँपालिकामा भूमिहीन दलित र भूमिहीन सुकुमवासी गरी २९ परिवारले जग्गाधनी पुर्जा प्राप्त गरेका छन्।

चितवनको इच्छाकामना नगरपालिकामा भूमिहीन दलित र भूमिहीन सुकुमवासी गरी ३४ परिवारलाई पुर्जा वितरण गरिएको छ। हालसम्म एउटै स्थानीय तहमा सबैभन्दा धेरै पुर्जा वितरण भएको पालिका इच्छाकामना नगरपालिका रहेको समितिले जनाएको छ।

यस्तै, डडेलधुराको अजयमेरु गाउँपालिकामा अव्यवस्थित बसोबास गरिरहेका सात परिवारलाई पनि जग्गाधनी पुर्जा वितरण गरिएको समितिले जानकारी दिएको छ।

२०८३ साउन २० गते बुधवार १६:४४ बजे प्रकाशित