काठमाडौं । नेपाल शिक्षक महासंघले आफ्ना शैक्षिक तथा पेसागत मागहरू सम्बोधन गराउन दबाबमूलक आन्दोलन सुरु गर्ने घोषणा गरेको छ। महासंघले आगामी भदौदेखि आन्दोलन गर्ने निर्णय गरेको हो।

महासंघको तेस्रो राष्ट्रिय परिषद् बैठकले आन्दोलनसहित १५ बुँदे निर्णय पारित गरेको जानकारी शुक्रबार पत्रकार सम्मेलनमार्फत दिइएको छ। बैठकले विगतदेखि उठाउँदै आएका मागहरूका साथै पछिल्ला नयाँ शैक्षिक र पेसागत मुद्दाहरूलाई समेटेर आन्दोलन अघि बढाउने निर्णय गरेको महासंघले जनाएको छ।

महासंघका अध्यक्ष लक्ष्मीकिशोर सुवेदीले शिक्षकका माग सम्बोधनका लागि भदौदेखि आन्दोलनमा जाने निर्णय भएको जानकारी दिए। उनले आन्दोलनका कार्यक्रम र मिति भने विस्तारित कार्यदलीय बैठकले तय गर्ने बताए।

परिषद् बैठकले आन्दोलनको स्वरूप, समयतालिका र अन्य आवश्यक तयारीका लागि अधिकार कार्यदलीय बैठकलाई प्रदान गरेको महासंघले जनाएको छ। शिक्षकका अधिकार, सेवा सुविधा र शिक्षा क्षेत्रसँग सम्बन्धित विभिन्न विषयलाई लिएर महासंघले सरकारमाथि दबाब बढाउने तयारी गरेको छ।

२०८३ साउन २२ गते शुक्रवार १७:४९ बजे प्रकाशित