काठमाडौं । ललितपुर महानगरपालिकाका प्रमुख चिरिबाबु महर्जनले पाटन अस्पतालसँगको सहकार्यमा सञ्चालित स्वास्थ्य कार्यक्रमका लागि नेपाल सरकारले बीमाको भुक्तानी नगरेको विषयमा समस्या भएको बताए।

पाटन स्वास्थ्य विज्ञान प्रतिष्ठानको १८ औं वार्षिकोत्सव कार्यक्रममा सम्बोधन गर्दै मेयर महर्जनले बीमा रकम भुक्तानी नहुँदा अस्पताल सञ्चालनमा चुनौती आएको र यदि सेवा बन्द हुनुपर्ने अवस्था आयो भने प्रत्यक्ष जिम्मेवारी आफूले लिने स्पष्ट पारे।

उनले भने, “नेपाल सरकारले पैसा तिरेन भनेर सुन्नमा आएको छ। यदि औपचारिक पत्रमार्फत महानगरपालिकालाई भुक्तानीको जिम्मेवारी दिइयो भने म भुक्तानी गरिदिन्छु। जे पर्ला पर्ला।”

मेयर महर्जनले पाटन अस्पतालकै प्राविधिक सल्लाहअनुसार नयाँ स्वास्थ्य केन्द्र स्थापना भइरहेको जानकारी दिँदै उक्त केन्द्र निकट भविष्यमा सञ्चालनमा आउने बताए। उनले थपे, “७५३ स्थानीय पालिकामध्ये ललितपुर महानगरपालिकाले पाटन अस्पतालसँग सहकार्य गरेर अघि बढाएको यो काम सम्पूर्ण पालिकाका लागि असल अभ्यास बनेको छ।”

२०८२ माघ २३ गते शुक्रवार १७:०८ बजे प्रकाशित