काठमाडौं । राष्ट्रिय सभाले सरकारबाट सामाजिक सञ्जाल विधेयक फिर्ता गर्ने निर्णयलाई सर्वसम्मतिले पारित गरेको छ। सोमबार बसेको राष्ट्रिय सभाको बैठकले विचाराधीन सामाजिक सञ्जाल विधेयक, २०८१ फिर्ता भएको निर्णय अनुमोदन गरेको हो।

सभाका अध्यक्ष नारायण दाहालले उक्त विधेयकमाथि निर्णयार्थ प्रस्तुत गर्दै विधेयक फिर्ता भएको घोषणा गरे।

यसअघि विधायन व्यवस्थापन समितिका सभापति तुलसाकुमारी दाहालले ‘सामाजिक सञ्जाल विधेयक, २०८१ सम्बन्धी विधायन व्यवस्थापन समितिको प्रतिवेदन’ सभामा पेस गरेकी थिइन्।

सभाको २०८२ भदौ १३ गते बसेको बैठकले राष्ट्रिय सभाबाट उक्त विधेयक उत्पत्ति गरी दफावार छलफलका लागि विधायन व्यवस्थापन समितिमा पठाएको थियो। समितिमा ३५ जना सांसदले १५५ वटा संशोधन प्रस्ताव दर्ता गराएका थिए।

समितिका सभापति दाहालका अनुसार उक्त विधेयकमाथि सूचना तथा सञ्चार प्रविधिमन्त्री, मन्त्रालयका सचिव तथा विभिन्न सरोकारवालासँग चरणबद्ध रूपमा अनौपचारिक छलफल गरिएको थियो।

यसैबीच, सञ्चार तथा सूचना प्रविधि मन्त्रालयले गत माघ २० गते सामाजिक सञ्जाल विधेयक फिर्ता माग्ने निर्णय गरेको थियो।

२०८२ माघ २६ गते सोमवार १७:२६ बजे प्रकाशित