काठमाडौं । राष्ट्रिय स्वतन्त्र पार्टी (रास्वपा) ले आगामी निर्वाचनपछि सरकारको नेतृत्व गर्न पाए १०० दिनभित्र साना बचतकर्ताहरूको रकम फिर्ता गर्ने प्रतिबद्धता जनाएको छ।

कर्णाली प्रदेशको राजधानी सुर्खेतमा बिहीबार सार्वजनिक गरिएको पार्टीको बाचापत्रमा आमनागरिकको पसिनाको कमाइ सुरक्षित गर्न सरकार गठन भएको सय दिनभित्र साना बचतकर्ताहरूको बचत खातामा रकम फिर्ता गरिने उल्लेख छ।

रास्वपाले बचतकर्ताहरूको रकम सुरक्षित गर्न राज्यका तर्फबाट ‘एकीकृत बचत सुरक्षा कोष’ स्थापना गर्ने घोषणा पनि गरेको छ। उक्त कोषमार्फत संकटग्रस्त सहकारी संस्थाका बचतकर्तालाई प्राथमिकताका आधारमा, साना बचतकर्तादेखि सुरु गरी भुक्तानी गर्ने व्यवस्था मिलाइने पार्टीको भनाइ छ।

बाचापत्रमा भनिएको छ, “आमनागरिकको पसिनाको कमाइ सुरक्षित गर्न सरकार गठन भएको १०० दिनभित्र साना बचतकर्ताहरूको बचत खातामा फिर्ता गर्नेछौं। बचतकर्ताहरूको कमाइ सुरक्षित गर्न राज्यको तर्फबाट एक ‘एकीकृत बचत सुरक्षा कोष’ स्थापना गर्नेछौं, जसले संकटग्रस्त संस्थाहरूका बचतकर्तालाई प्राथमिकताका आधारमा साना बचतकर्तादेखि सुरु गरी भुक्तानीको व्यवस्था गर्नेछ।”

रास्वपाले आफ्नो उद्देश्य सहकारीका सञ्चालकहरूलाई जेल हाल्नु मात्र नभई बचतकर्ताको रकम फिर्ता गराउनु भएको स्पष्ट पारेको छ। “हाम्रो उद्देश्य सञ्चालकहरूलाई जेल हाल्नुमात्र होइन, बरू बचतकर्ताको पैसा फिर्ता गराउनु हो,” बाचापत्रमा उल्लेख छ।

त्यस्तै, नीतिअनुसार सहकारी वित्तीय संस्थाका सञ्चालकहरू बचतकर्ताको रकम फिर्ता गर्न तयार भए कानुनी रूपमा मिलापत्रको बाटो खुला गरिने पनि जनाइएको छ। यस्तो अवस्थामा बचत फिर्ताको पूर्ण ग्यारेन्टी र निश्चित समयसीमा तोकेर उनीहरूलाई थुनाबाहिरै रहेर सम्पत्ति परिचालन तथा ऋण असुली गर्ने अवसर दिने व्यवस्था गरिने रास्वपाले जनाएको छ।

२०८२ फागुन ७ गते बिहीवार १७:२५ बजे प्रकाशित