तराई, पहाड र हिमाललाई अलग गरेर राजनीति गर्नेको अन्त्य हुन्छ: रवि लामिछाने
काठमाडौँ । राष्ट्रिय स्वतन्त्र पार्टी (रास्वपा) का सभापति रवि लामिछाने ले तराई, पहाड र हिमाललाई अलग गरेर राजनीति गर्ने प्रवृत्तिको अन्त्य हुने बताएका छन्।
बुधवार जनकपुरधाम स्थित जानकी मन्दिर मा दर्शनपछि समर्थकलाई सम्बोधन गर्दै उनले रास्वपा कुनै एक क्षेत्र वा समुदायको नभई समग्र देशको विकासका लागि प्रतिबद्ध रहेको बताए। उनले अब क्षेत्रीय विभाजनको आधारमा राजनीति गर्नेहरूको ‘दोकान बन्द हुने’ दाबी गरे।
लामिछानेले सिङ्गो देश र मधेसलाई विभाजन गरेर राजनीति गर्ने युग अन्त्य गर्नुपर्ने आवश्यकता औँल्याए। इमानदारीपूर्वक देशको पक्षमा उभिने, जनताको प्रत्येक मतको सम्मान गर्ने र सुशासन स्थापना गर्ने दिशामा पार्टी अघि बढ्ने उनको भनाइ थियो।
दशकौँदेखि विभेद र अन्यायमा परेको मधेसलाई प्राथमिकतामा राख्दै यहाँका धार्मिक पर्यटन क्षेत्रको विकासमा विशेष ध्यान दिइने उनले बताए।
अघिल्लो निर्वाचनमा सुशासनको मुद्दा उठाए पनि विभेदको सवालमा पर्याप्त आवाज उठाउन नसकेको स्वीकार गर्दै उनले यसपटक विभेदको अन्त्यसँगै सुशासन स्थापना गर्न गम्भीरतापूर्वक लाग्ने प्रतिबद्धता व्यक्त गरे।
२०८२ फागुन १३ गते बुधवार १७:१८ बजे प्रकाशित
