काठमाडौँ । नेकपा (एमाले)का अध्यक्ष केपी शर्मा ओलीले सांसदहरूलाई संसद्मा पार्टीका आधिकारिक विचार मात्रै राख्न निर्देशन दिएका छन्।

बिहीबार पार्टी केन्द्रीय कार्यालय च्यासलमा नवनिर्वाचित प्रतिनिधिसभा सदस्यहरूलाई सम्बोधन गर्दै उनले व्यक्तिगत धारणा प्रस्तुत गर्न नपाइने स्पष्ट पारे।

उनले भने, “संसद्मा पार्टीका विचार नै बोल्नुपर्छ। पार्टीले देशको विचार अघि बढाएको छ। ती बाहेक ‘मलाई यस्तो लाग्यो’ भनेर बोल्न मिल्दैन।”

ओलीले पार्टीको संसदीय भूमिका प्रभावकारी रूपमा अगाडि बढाइने उल्लेख गर्दै भ्रम फैलाउनेभन्दा जनतालाई सचेत बनाउने काममा जोड दिनुपर्ने बताए।

“हामी भ्रम फैलाउने होइनौँ, जनतालाई सचेत बनाउने काममा चुक्नु हुँदैन। त्यसका लागि एकताबद्ध भएर अघि बढ्नुपर्छ,” उनले भने।

पार्टीभित्र एकता कायम राख्नु अहिलेको मुख्य आवश्यकता भएको उल्लेख गर्दै उनले प्रतिकूल अवस्थामा आन्तरिक विवाद निकाल्नु उपयुक्त नहुने बताए।

“जति बेला पार्टी प्रतिकूल अवस्थामा हुन्छ, त्यति बेला पार्टीभित्र अनेक समस्या निकाल्नु उपयुक्त हुँदैन,” उनले भने।

साथै, उनले सांसदहरूलाई पार्टीको नीति र निर्णयअनुसार अनुशासित भएर काम गर्न आग्रह गरे। “संसद् पार्टीका नीति–निर्णयअनुसार चल्नुपर्छ। हामी आफूखुसी चल्न त्यहाँ पुगेका होइनौँ,” उनले स्पष्ट पारे।

२०८२ चैत १२ गते बिहीवार १७:२३ बजे प्रकाशित