काठमाडौं । शिक्षा, विज्ञान तथा प्रविधि मन्त्रालय ले शैक्षिक सत्र सुरु हुनुअघि विद्यार्थी भर्ना गर्ने र अग्रिम शुल्क असुल गर्ने विद्यालयहरूलाई कारबाही गर्न निर्देशन दिएको छ।

मन्त्रालयका अनुसार केही विद्यालयहरूले नियमविपरीत भर्ना सुरु गरेको र चर्को शुल्क लिएको गुनासो प्राप्त भएको छ। अधिकांश निजी विद्यालयले ‘एन्युअल फी’ शीर्षकमा भर्ना शुल्क उठाउँदै आएका छन्।

मन्त्रालयले संघीय मामिला तथा सामान्य प्रशासन मन्त्रालयलाई पत्राचार गर्दै देशभरका ७५३ वटै स्थानीय तहमार्फत विद्यालयहरूको अनुगमन गर्न र नियम उल्लंघन गर्नेलाई कारबाहीको दायरामा ल्याउन आग्रह गरेको छ।

कतिपय विद्यालयले शैक्षिक सत्र सुरु नहुँदै विद्यार्थी भर्ना गर्ने, स्वीकृत शीर्षकभन्दा बाहिर गएर शुल्क लिने, र एउटै विद्यालयमा अर्को कक्षामा प्रवेश गर्दा पटक(पटक भर्ना शुल्क असुल गर्ने गरेको पाइएपछि मन्त्रालयले यसलाई गैरकानुनी ठहराएको छ।

मन्त्रालयको पत्रमा भनिएको छ, ‘शिक्षा नियमावली २०५९ को परिच्छेद १५ अनुसार शैक्षिक सत्र सुरु नभइ विद्यार्थी भर्ना गर्न नपाइने स्पष्ट व्यवस्था छ। प्रचलित कानून र स्वीकृत शीर्षकभन्दा बाहिर गएर शुल्क लिनु गैरकानूनी हो।’

सर्वोच्च अदालतको फैसला सम्झाउँदै मन्त्रालयले नियमविपरीत लिइएको अग्रिम शुल्क तत्काल फिर्ता गराउन भनेको छ र कुनै विद्यालयले अटेरी गरे कारबाही गर्न निर्देशन दिएको छ।

२०८२ चैत २४ गते मंगलवार १७:१७ बजे प्रकाशित