काठमाडौं । काठमाडौं महानगरपालिका ले आफ्ना कर्मचारीहरूका लागि सवारी साधन आलोपालो प्रयोग गर्ने ‘कार पुलिङ’ कार्यक्रम कार्यान्वयनमा ल्याएको छ।

कार्यवाहक प्रमुख सुनिता डंगोल ले इन्धन कटौतीपछि देखिएको समस्या समाधान गर्न उक्त कार्यक्रम सुरु गरिएको जानकारी दिइन्।

उनका अनुसार विश्वव्यापी इन्धन अभावका कारण उत्पन्न परिस्थितिले दीर्घकालमा नकारात्मक प्रभाव पार्न सक्ने भएकाले इन्धन खपत घटाउने उद्देश्यले यस्तो निर्णय गरिएको हो। उनले अत्यावश्यक सेवा सञ्चालनमा समस्या नआओस् भन्नका लागि इन्धन बचत अपरिहार्य भएको उल्लेख गरिन्।

महानगरपालिकाले यसअघि नै ४८औँ कार्यपालिका बैठकबाट इन्धन कोटामा कटौती गरिसकेको छ।

‘कार पुलिङ’ कार्यक्रमअन्तर्गत बसोबास क्षेत्रका आधारमा एउटै स्थानबाट आवतजावत गर्ने कर्मचारीहरूको समूह बनाइएको छ। समूहका सदस्यहरूले आफ्ना सवारी साधन आलोपालो प्रयोग गर्दै सहकर्मीहरूलाई कार्यालय ल्याउने–लाने व्यवस्था मिलाउनुपर्नेछ।

यसबाट कार्यालय आउने–जाने सवारी साधनको संख्या घट्ने र इन्धन खपत कम हुने महानगरपालिकाको विश्वास छ।

२०८२ चैत २९ गते आइतवार १७:११ बजे प्रकाशित