काठमाडौं । पूर्वगृहमन्त्री सुधन गुरुङ आफ्नो सम्पत्तिसम्बन्धी छानबिनबाट सफाइ पाएपछि पुन: जिम्मेवारी सम्हाल्ने अवसर प्राप्त हुनेमा आशावाद व्यक्त गरेका छन्। उनले आफूलाई फेरि गृहमन्त्रीको जिम्मेवारी दिइए दुई महिनाभित्रै उल्लेखनीय कामको सुरुवात गरेर देखाउने बताएका छन्।

आइतबार राष्ट्रिय स्वतन्त्र पार्टी (रास्वपा) गोरखाको अधिवेशन समारोहलाई सम्बोधन गर्दै गुरुङले आफूलाई सक्षम र योग्य ठानेर पुन: जिम्मेवारी दिइए केही समय काम गर्ने अवसर दिन आग्रह गरे।

‘मलाई फेरि त्यो जिम्मेवारीका लागि योग्य ठान्नुहुन्छ र अवसर दिनुहुन्छ भने मलाई केही समय दिनुहोस्,’ उनले भने, ‘दुई महिनाजति समय दिनुहोस्। त्यो अवधिमा फोटो खिच्ने, माला–खादा लगाउने, बधाई दिने वा मन्त्रालय धाउने काम नगरौँ।’

उनले जिम्मेवारी पाएपछि सुरुका दुई महिना पूर्ण रूपमा काममा केन्द्रित हुने बताउँदै त्यस अवधिमा मन्त्रालयका विभिन्न कामलाई व्यवस्थित बनाउने दाबी गरे।

‘दुई महिना समय दिनुहोस्, म धेरै कामको सुरुवात गरेर देखाउँछु। त्यसपछि पनि अपेक्षाअनुसार काम भएन भने तपाईंहरूले प्रश्न उठाउन सक्नुहुन्छ,’ उनले भने।

गुरुङले आफू सधैं जनताको विश्वास र मतको सम्मान गर्दै आएको उल्लेख गर्दै आफ्नो राजनीतिक धरातल नबिर्सिएको पनि बताए। उनले जनताप्रतिको उत्तरदायित्वलाई प्राथमिकतामा राखेर काम गर्ने प्रतिबद्धता व्यक्त गरे।

२०८३ जेठ २४ गते आइतवार १७:५६ बजे प्रकाशित