देवानगञ्ज घटनापछि सप्तरीमा सद्भावको सन्देश, राजविराज र बोदेबरसाइनमा निकालियो शान्ति र्याली
राजविराज । सुनसरीको देवानगञ्ज गाउँपालिका–३, कप्तानगञ्जमा भएको घटनापछि उत्पन्न तनावपूर्ण अवस्थाबीच सप्तरीमा धार्मिक तथा सामाजिक सद्भाव कायम राख्न विभिन्न स्थानमा शान्ति र सद्भाव र्याली आयोजना गरिएको छ।
शान्ति र लोकतन्त्रका लागि पेसागत सञ्जाल (पापड) सप्तरीको आयोजनामा राजविराजमा सद्भाव र्याली निकालिएको हो। यस्तै, बोदेबरसाइन नगरपालिकाको नेतृत्वमा पनि धार्मिक तथा जातीय सद्भावलाई सुदृढ बनाउने उद्देश्यले छुट्टै र्याली सम्पन्न भएको छ।
‘सामाजिक सद्भाव कायम गरौं, आपसी भाइचारा सम्बन्ध स्थापित गरौं र एकअर्कालाई सम्मान गरौं’ भन्ने नारासहित आयोजित र्यालीमा स्थानीय राजनीतिक दलका प्रतिनिधि, सरोकारवाला निकाय, नागरिक समाज तथा हिन्दु र मुस्लिम समुदायका व्यक्तिहरूको सहभागिता रहेको थियो।
बोदेबरसाइनमा आयोजित कार्यक्रममा सप्तरी निर्वाचन क्षेत्र नं. ४ (ख) का प्रदेशसभा सदस्य अनिरुद्ध सिंह यादव, नगरप्रमुख आतेश कुमार सिंहलगायत स्थानीय जनप्रतिनिधिको उपस्थिति थियो।
र्यालीमा सहभागीहरूले कुनै पनि विवाद वा द्वन्द्वले समस्याको समाधान नदिने उल्लेख गर्दै सामाजिक सद्भाव, सहिष्णुता र आपसी विश्वासलाई बलियो बनाउन सबै पक्ष एकजुट हुनुपर्नेमा जोड दिएका थिए।
नेपाल पत्रकार महासंघ सप्तरीका अध्यक्ष श्रवणकुमार देवले देवानगञ्ज घटनापछि सिर्जिएको परिस्थितिलाई सामान्य बनाउन र समुदायबीच विश्वास कायम राख्ने उद्देश्यले सद्भाव र्याली आयोजना गरिएको बताए।
स्थानीयवासीले यस्ता कार्यक्रमले राजविराज र बोदेबरसाइनमा देखिएको तनाव कम भई जनजीवन पुन: सामान्य हुने विश्वास व्यक्त गरेका छन्।
देवानगञ्ज घटनापछि सुरक्षा अवस्थालाई ध्यानमा राख्दै साउन १४ गते राति १० बजेदेखि बोदेबरसाइन र साउन १५ गते बिहान ८ बजेदेखि राजविराज क्षेत्रमा प्रमुख जिल्ला अधिकारीले कर्फ्यु आदेश जारी गरेका थिए।
२०८३ साउन १७ गते आइतवार १७:२१ बजे प्रकाशित
