काठमाडौँ। रसुवामा आएको विनाशकारी बाढीबाट नेपालमा भएको ठूलो जनधनको क्षतिप्रति चीनले गहिरो दुःख व्यक्त गर्दै विपत्तिको समयमा नेपाल एक्लै नरहेको सन्देश दिएको छ।

चिनियाँ राष्ट्रपति सी चिनपिङ र प्रधानमन्त्री ली छियाङले बाढीमा ज्यान गुमाएका नेपालीप्रति श्रद्धाञ्जली अर्पण गर्दै दुःखको यस घडीमा चीन नेपाल र नेपाली जनताको साथमा रहेको सन्देश नेपाल सरकारलाई पठाउनुभएको हो।

नेपालका लागि चिनियाँ राजदूत झाङ माओमिङले आइतबार अर्थ मन्त्रालयमा अर्थमन्त्री डा. स्वर्णिम वाग्लेलाई भेटेर चिनियाँ राष्ट्रपति र प्रधानमन्त्रीको सन्देश सुनाउनुभएको हो। सो अवसरमा उहाँले चीन सरकारका तर्फबाट प्रधानमन्त्री राहत कोषका लागि घोषणा गरिएको २० लाख अमेरिकी डलर अर्थात् करिब साढे ३० करोड नेपाली रुपियाँ बराबरको सहयोगको चेक हस्तान्तरण गर्नुभयो।

“बाढीको विपत्तिका कारण नेपालमा ज्यान गुमाउनुभएका नागरिकप्रति चिनियाँ राष्ट्रपति सी चिनपिङ र प्रधानमन्त्री ली छियाङले गहिरो दुःख व्यक्त गर्नुभएको छ,” राजदूत माओमिङले भन्नुभयो, “यो दुःखमा नेपाल एक्लै छैन। चीन नेपाल र नेपाली जनताको साथमा छ।”

चिनियाँ रेडक्रसबाट पनि तीन करोडभन्दा बढी सहयोग

चीन सरकारको सहयोगसँगै चिनियाँ रेडक्रसले पनि बाढी प्रभावित नेपालका लागि आर्थिक सहयोग उपलब्ध गराएको छ।

राजदूत माओमिङले दुई लाख अमेरिकी डलर अर्थात् करिब तीन करोड छ लाख नेपाली रुपियाँ बराबरको नगद सहयोगसमेत अर्थमन्त्री वाग्लेलाई हस्तान्तरण गर्नुभयो।

यससँगै चीन सरकार र चिनियाँ रेडक्रसबाट मात्रै नेपालले करिब ३३ करोड ६ लाख रुपियाँ बराबरको आर्थिक सहयोग प्राप्त गरेको छ।

५० टन राहत सामग्री नेपाल आइपुग्यो

चीनले आर्थिक सहयोगसँगै राहत सामग्रीसमेत नेपाल पठाउन थालेको छ।

राजदूत माओमिङका अनुसार आइतबार मात्रै दुईवटा चिनियाँ जहाजमार्फत ५० टन राहत सामग्री काठमाडौँ ल्याइएको छ। टेन्ट, ब्ल्याङ्केट, स्लिपिङ ब्याग, मेडिकल किट र बिस्कुटलगायत सामग्री नेपाल आइपुगेका हुन्।

नेपालका लागि चीन सरकारले घोषणा गरेका अन्य सहायता सामग्रीसमेत नेपाल भित्रिन सुरु भइसकेको राजदूत माओमिङले जानकारी दिनुभयो।

उहाँले विपद्पछिको उद्धार तथा राहत कार्यमा चीनको सहयोग निरन्तर जारी रहने प्रतिबद्धता पनि व्यक्त गर्नुभयो।

‘नेपाल र चीन मिलेर विपत्तिको सामना गर्ने’

राहत सहयोग हस्तान्तरण गर्दै राजदूत माओमिङले हिमालय क्षेत्रमा आएको ठूलो प्राकृतिक विपत्तिको सामना नेपाल र चीनले मिलेर गर्ने बताउनुभयो।

उहाँका अनुसार नेपालमा आएको बाढीबाट भएको क्षतिप्रति चीन गम्भीर र दुःखी छ। विपद्पछिको उद्धार, राहत तथा पुनःस्थापनामा आवश्यक सहयोग निरन्तर उपलब्ध गराउने चीनको प्रतिबद्धता रहेको उहाँले बताउनुभयो।

चीनमा रोकिएका नेपालीलाई नेपाल फर्काउन पहल

रसुवामा आएको बाढीका कारण चीनतर्फ नै रोकिएका नेपाली नागरिकलाई नेपाल फर्काउने विषयमा समेत चीनले पहल गरिरहेको छ।

राजदूत माओमिङले चीनमा रोकिएका नेपालीलाई मुस्ताङको कोरला नाका हुँदै नेपाल फर्काउने व्यवस्था मिलाउन पहल भइरहेको जानकारी अर्थमन्त्री वाग्लेलाई गराउनुभयो।

यसअघि नै चीनले नेपालमा आएको विपत्तिप्रति दुःख व्यक्त गर्दै खोज, उद्धार तथा राहतका लागि सहयोग गर्ने प्रतिबद्धता जनाएको थियो। पछिल्लो सहयोगसँगै नेपालमा राहत तथा उद्धारका लागि चीनबाट आर्थिक तथा भौतिक सहयोग आउने क्रम थप बढेको छ।

२०८३ भदौ १५ गते सोमवार ११:३६ बजे प्रकाशित