काठमाडौं । प्रधानमन्त्री सुशीला कार्कीले स्वास्थ्य बीमाको स्रोत र व्यवस्थासम्बन्धी समस्या तत्काल समाधान गर्ने प्रतिबद्धता जनाएकी छिन्।

बुधबार सम्बन्धित पक्षसँगको छलफलका क्रममा प्रधानमन्त्री कार्कीले भने, स्वास्थ्य बीमा कार्यक्रम विपन्न वर्गको लागि भएकोले यसलाई विपद्कै रूपमा लिई अर्थमन्त्रीसँग छिटो छलफल गरी समाधान गर्नु आवश्यक रहेको छ। साथै, उनले यो कार्यक्रमलाई कडा नियमन गरेर व्यवस्थित रूपमा अघि बढाउन जरुरी रहेको बताइन्।

प्रधानमन्त्री कार्कीले भनिन्, “गरिव, अपांग र अशक्त वर्गका लागि बनाइएको स्वास्थ्य बीमा कार्यक्रमबाट मान्छेले समयमै उपचार पाउनुपर्छ। पैसा त खर्च भइरहेको छ, तर सेवाको प्रभावकारी वितरण भैरहेको छैन। त्यसैले नियमपूर्वक कार्यक्रम सञ्चालन गर्नुपर्छ।”

उनले थपिन् कि सरकारले आवश्यक बजेट ऋण वा अन्य स्रोतबाट व्यवस्थापन गर्ने, र सबै लाभग्राहीले न्यायपूर्ण रूपमा सेवा पाउने सुनिश्चित गर्ने छ। प्रधानमन्त्री कार्कीले समस्याको समाधानका लागि अर्थमन्त्री फर्किएपछि विस्तृत छलफल गरी सुधार गरिने पनि बताइन्।

२०८२ माघ २१ गते बुधवार १७:१० बजे प्रकाशित