ताप्लेजुङ। प्रतिनिधिसभामा ताप्लेजुङबाट यसपटक तीन जनाले समानुपातिक सांसद बन्ने अवसर पाएका छन्।यही फागुन २१ गते सम्पन्न प्रतिनिधिसभा सदस्यको निर्वाचनमार्फत सबैभन्दा ठूलो दल बनेको राष्ट्रिय स्वतन्त्र पार्टी (रास्वपा) बाट दुई र दोस्रो ठूलो दल नेपाली काँग्रेसका तर्फबाट एक जनाले समानुपातिक सांसद बन्ने अवसर पाएका हुन् ।

निर्वाचन आयोग नेपालले सोमबार सार्वजनिक गरेको समानुपातिक निर्वाचन प्रणालीअन्तर्गत निर्वाचित हुने सांसद अर्थात प्रतिनिधिसभा सदस्यको विवरणअनुसार ताप्लेजुङ क्षेत्र रहेर रास्वपाबाट रमेश प्रसाईं र मिङ्मा ग्याबु शेर्पा सांसद बनेको छ।प्रसाईं खसआर्य समूहबाट र शेर्पाले आदिवासी जनजाति समूहबाट प्रतिनिधिसभा सदस्य बन्ने अवसर पाएको हो ।

यस्तै नेपाली काँग्रेसको तर्फबाट गीताकुमारी सेन्दाङले सांसद अर्थात प्रतिनिधिसभा सदस्य बन्ने अवसर पाएको छन्।आदिवासी जनजाति महिला समूहअन्तर्गत सेन्दाङलाई समानुपातिक प्रणालीमार्फत सांसद बन्ने अवसर मिलेको हो।रास्वपाले आयोगमा बुझाएको बन्दसूचीमा प्रसाईं र शेर्पाको नामबाहेक यहाँबाट निर्मला खिम्दिङ लिम्बू (मिरा) को नाम पनि समावेश थियो।काँग्रेसका तर्फबाट सेन्दाङको नाम मात्र बन्दसूचीमा परेको थियो ।

प्रतिनिधिसभा सदस्य बन्ने अवसर प्राप्त गरेका प्रसाईं जन्मसिद्ध दृष्टिविहीन भएर पनि अद्वितीय क्षमता भएका र प्रखर वक्ताका रुपमा चिनिन्छन्।त्यस्तै शेर्पा प्रख्यात पर्वतारोही छन्।उनले सर्बोच्च शिखर सगरमाथा र मनास्लु हिमाल नौ–नौ पटक आहोरण गरेर गिनिज बुकमा नाम लेखाइसकेको छन् ।यसैगरी सेन्दाङ पनि सामाजिक अभियान्ता र महिला नेतृका रुपमा परिचित छिन्।

यता समानुपातिक प्रणालीमार्फत सांसद बन्ने अवसर प्राप्त गरेका प्रसाईं, शेर्पा र सेन्दाङसमेत ताप्लेजुङबाट प्रतिनिधि सभामा प्रतिनिधित्व गर्ने सांसदको सङ्ख्या चार पुगेको छ।एकमात्र प्रतिनिधिसभा सदस्य निर्वाचन क्षेत्र रहेको जिल्लामा प्रत्यक्षतर्फ नेकपा (एमाले) का क्षितिज थेबे निर्वाचित भएको छन्।

२०८२ चैत ४ गते बुधवार १७:१७ बजे प्रकाशित