काठमाडौं । राष्ट्रिय मानव अधिकार आयोग ले भदौ २३ र २४ गते भएका घटनाको छानबिन गर्न सरकारले गठन गरेको न्यायिक आयोगका अध्यक्ष गौरीबहादुर कार्कीमाथि नै अनुसन्धान गर्न सिफारिस गरेको छ।

आयोगले ती घटनाका क्रममा भएको मानवीय तथा भौतिक क्षतिमा कार्कीको कुनै संलग्नता रहेरनरहेको, साथै उनका सार्वजनिक अभिव्यक्तिले प्रदर्शनकारीहरूलाई आक्रोशित वा उत्तेजित बनाउन कुनै असर गरेको थियो वा थिएन भन्ने विषयमा समेत छानबिन गर्नुपर्ने जनाएको छ।

आयोगका अनुसार सार्वजनिक शान्ति र सुव्यवस्थामा खलल पुग्ने गतिविधिमा कार्कीसहित अन्य व्यक्तिहरूको संलग्नता वा दुरुत्साहन भएरनभएकोबारे सूक्ष्म अनुसन्धान गरी दोषी देखिए कानुनी कारबाही गर्न सिफारिस गरिएको हो।

जेनजी आन्दोलनका क्रममा कार्कीले सामाजिक सञ्जालमार्फत भड्काउ अभिव्यक्ति दिएको आरोप लागेपछि उनको आलोचना भएको थियो। त्यसकै बीच सरकारले उनलाई घटनाको छानबिन गर्न गठित न्यायिक आयोगको अध्यक्ष नियुक्त गरेको थियो।

उक्त आयोगले भदौ २३ गतेको घटनाबारे मात्रै अनुसन्धान गरी सरकारलाई प्रतिवेदन बुझाएको थियो। तर प्रतिवेदन निष्पक्ष नभएको भन्दै प्रतिपक्षी दलहरूले विरोध जनाउँदै आएका छन्।

२०८३ जेठ १३ गते बुधवार १८:०८ बजे प्रकाशित