काठमाडौं । देशभर एलपी ग्यासको अभावका कारण उपभोक्ता समस्यामा परिरहेका बेला सरकारले कृत्रिम अभाव र कालोबजारी नियन्त्रण गर्न सक्रियता बढाएको छ। उद्योग, वाणिज्य तथा आपूर्ति मन्त्रालयले बजारमा ग्यास वितरणमा अनियमितता देखिए सिधै उजुरी गर्न सर्वसाधारणलाई आग्रह गरेको छ।

उद्योगमन्त्री गौरीकुमारी यादवको सचिवालयले जारी गरेको सूचनाअनुसार बजारमा ग्यासको कृत्रिम अभाव सिर्जना गरिएको, तोकिएको मूल्यभन्दा बढी रकम असुलिएको वा आपूर्तिमा कुनै समस्या देखिए उपभोक्ताले मोबाइल नम्बर ९८५१११६७७३ मा सम्पर्क गरेर जानकारी गराउन सक्नेछन्।

मन्त्रालयले प्राप्त हुने हरेक गुनासोलाई गम्भीरतापूर्वक अध्ययन गरी सम्बन्धित निकायसँग समन्वय गरेर आवश्यक कारबाही तथा समस्या समाधानका लागि तत्काल पहल गरिने जनाएको छ।

करिब २० दिनदेखि ग्यास आपूर्ति सहज हुन नसक्दा विभिन्न स्थानका डिपोमा उपभोक्ताको लामो लाइन लाग्ने गरेको छ। धेरै उपभोक्ता घण्टौं पालो कुर्दासमेत रित्तो सिलिन्डर बोकेर फर्किन बाध्य भएको गुनासो बढिरहेको छ।

यही अवस्थाको फाइदा उठाउँदै केही व्यवसायीले कृत्रिम अभाव सिर्जना गरी बढी मूल्यमा ग्यास बिक्री गरिरहेको गुनासो बढेपछि मन्त्रालयले उपभोक्तासँग प्रत्यक्ष सूचना संकलन गर्ने व्यवस्था मिलाएको हो। मन्त्रालयले ग्यास वितरणमा अनियमितता गर्ने व्यक्ति वा संस्थाविरुद्ध आवश्यक कारबाही प्रक्रिया अघि बढाइने पनि जनाएको छ।

२०८३ साउन २१ गते बिहीवार १७:२९ बजे प्रकाशित