काठमाडौं । बाढीबाट प्रभावित नेपाली परिवारका लागि अमेरिकाले ३६ लाख अमेरिकी डलरभन्दा बढीको आपत्कालीन मानवीय सहायता उपलब्ध गराउने भएको छ। अमेरिकी सहयोगबाट बाढी प्रभावित १० हजार घरपरिवारले तीन महिनासम्म आपत्कालीन खाद्यान्न पाउने भएका छन्।

अमेरिकी विदेश मन्त्रालयले आइतबार सामाजिक सञ्जाल ‘एक्स’मार्फत नेपालका बाढी प्रभावित नागरिकका लागि जीवनरक्षक मानवीय सहायता घोषणा गरेको हो।

विपद्का कारण प्रभावित परिवारलाई तत्काल आवश्यक पर्ने खाद्यान्नलगायतका आधारभूत सहयोग उपलब्ध गराउने उद्देश्यले उक्त सहायता परिचालन गरिने मन्त्रालयले जनाएको छ।

अमेरिकी विदेश मन्त्रालयले विपद्को कठिन परिस्थितिमा अमेरिका नेपाली जनताको साथमा रहेको समेत जनाएको छ। बाढीका कारण प्रभावित नागरिकलाई राहत तथा आवश्यक सहयोग उपलब्ध गराउन अमेरिकी सहायता महत्वपूर्ण हुने अपेक्षा गरिएको छ।

यसैबीच, नेपालमा रहेका अमेरिकी नागरिकहरूको सुरक्षा आफ्नो सर्वोच्च प्राथमिकता रहेको अमेरिकी विदेश मन्त्रालयले स्पष्ट पारेको छ।

अमेरिकाले उपलब्ध गराउने उक्त मानवीय सहयोग बाढी प्रभावित परिवारको तत्कालीन आवश्यकता सम्बोधन गर्न केन्द्रित हुनेछ।

२०८३ भदौ १४ गते आइतवार १०:३२ बजे प्रकाशित