धनगढी । नेपाली कम्युनिस्ट पार्टीका नेता डा.भीम रावलले २३–२४ भदौमा राष्ट्र संकटका बेला तत्कालीन प्रधानमन्त्री केपी शर्मा ओलीले हेलिकोप्टरबाट भागेको घटनालाई जनताले अस्वीकार गर्ने बताएका छन्।

रावलले आइतबार धनगढीमा आयोजित पत्रकार सम्मेलनमा आगामी १३ मंसिरमा हुने एकता सन्देश सभा बारे जानकारी दिँदै, संकटको समयमा ओली र सत्तारुढ गठबन्धन नेपाली कांग्रेसले कुनै भूमिका नखेलेको भन्दै आक्रोश व्यक्त गरे।

उनले भने, “गठबन्धन सरकारका प्रधानमन्त्रीले बारम्बार आफू शक्तिशाली रहेको दावी गर्थे, तर २३–२४ भदौको अकल्पनीय घटनामा न त त्यसले उपस्थिति देखायो न त राष्ट्रका व्यवस्थापिका, कार्यपालिका र प्रशासनको संरक्षण गर्न सके। उल्टो, ओलीले राष्ट्रिय सुरक्षा परिषद् र केन्द्रीय सुरक्षा समितिको बैठक नगरी आफ्नो ज्यान बचाउन सेनाको हेलिकोप्टरबाट भागेका छन्।”

रावलले नेपाली कांग्रेसलाई पनि ओलीको पछाडि लागेर जिम्मेवारी पूरा गर्न असफल भएको दाबी गर्दै भने, “२३–२४ भदौको घटनाको जिम्मेवारी नेकपा एमाले र कांग्रेसको शीर्ष नेतृत्वसँगै सरकारमा रहेका व्यक्तिहरूले लिनुपर्छ। जनताले आम निर्वाचनमार्फत यसका लागि किनारा लगाउनेछन्।”

उनले घटनाको निष्पक्ष छानविन गरि दोषीलाई कानुनी कारवाहीको दायरामा ल्याउनुपर्ने जोड दिएका छन्।

२०८२ मंसिर ७ गते आइतवार १७:१२ बजे प्रकाशित