काठमाडौं । सरकारले फिर्ता बोलाएका ११ मध्ये ६ जना राजदूतले राजीनामा दिएका छन्। उनीहरूले बुझाएको राजीनामा परराष्ट्र मन्त्रालयले स्वीकृत पनि गरिसकेको छ।

परराष्ट्र मन्त्रालयका प्रवक्ता लोकबहादुर पौडेल क्षेत्रीका अनुसार हालै रुसका लागि नेपाली राजदूत जंगबहादुर चौहान र मलेसियाका लागि नेपाली राजदूत डा। नेत्रप्रसाद तिमल्सिनाले राजीनामा दिएका छन्।

यसअघि अमेरिका स्थित राजदूत लोकदर्शन रेग्मी, चीनका कृष्णप्रसाद ओली, बेलायतका चन्द्रकुमार घिमिरे र कतारका रमेशचन्द्र पौडेलले राजीनामा दिइसकेका थिए।

सरकारले ३० असोजमा ११ देशमा कार्यरत राजदूतलाई कार्यप्रगतिबारे प्रश्न उठाउँदै फिर्ता बोलाउने निर्णय गरेको थियो। सो निर्णयविरुद्ध सर्वोच्च अदालतमा रिट दायर भएपछि अदालतले १६ कात्तिकमा अन्तरिम आदेश जारी गर्दै मुद्दा टुंगो नलागेसम्म फिर्ता बोलाउने निर्णय कार्यान्वयन नगर्न भनेको थियो।

अन्तरिम आदेशपछि सरकारले घुमाउरो शैलीमा राजदूतहरूलाई मन्त्रालयमा हाजिर भई कामकाज गर्न निर्देशन दिएको थियो।

मन्त्रालयमा कामकाजमा फर्काइएका तर राजीनामा नदिएका बाँकी पाँच राजदूतमा शैल रुपाखेती (जर्मनी), धनप्रसाद पण्डित (इजरायल), नरेशविक्रम ढकाल (साउदी अरब), शनिल नेपाल (स्पेन) र डा. दुर्गाबहादुर सुवेदी (जापान) छन्।

यी पाँच जना राजदूत दैनिक मन्त्रालयमा हाजिर भइरहे पनि सर्वोच्च अदालतको मुद्दा टुंगो लागेपछि मात्रै आगामी निर्णय लिने मनस्थितिमा रहेको बताइएको छ।

२०८२ मंसिर १९ गते शुक्रवार १७:१३ बजे प्रकाशित