काठमाडौं । राष्ट्रिय स्वतन्त्र पार्टी (रास्वपा)का वरिष्ठ नेता बालेन्द्र शाह (बालेन)ले प्रतिनिधिसभा सदस्य निर्वाचनको तयारीबारे पार्टीका उम्मेदवारहरूसँग छलफल गरेका छन्। आफ्नो निर्वाचन क्षेत्रबाट काठमाडौं फर्किएका शाहले उपत्यकाभित्रका उम्मेदवारसँग चुनावी रणनीतिबारे ब्रिफिङ लिएका हुन्।

भेटमा शाहले उम्मेदवारहरूबाट आ–आफ्ना निर्वाचन क्षेत्रको अवस्था, अभियानको प्रगति र चुनौतीबारे जानकारी लिएको सहभागी नेताहरूले बताएका छन्।

छलफलपछि सञ्चारकर्मीसँग कुरा गर्दै ललितपुर–३ की उम्मेदवार तोसिमा कार्कीले बालेनले चुनावी अभियानको अपडेट लिएको बताइन्। ‘उहाँले हामीहरूसँग अभियानको प्रगति बारे जानकारी लिनुभयो। चुनावी रणनीतिबारे पनि थोरै छलफल भयो। उहाँले स्पष्ट रूपमा भन्नुभयो—सरकार हाम्रो बन्दैछ, ढुक्क भएर जनताको घर–घरमा जानुस्, समस्या सुन्नुस्,’ कार्कीले भनिन्।

अर्की उम्मेदवार रञ्जु दर्शनाले पनि भेटमा चुनावी रणनीतिबारे छलफल भएको जानकारी दिइन्। ‘उहाँले ढुक्क भएर चुनावी क्याम्पेनमा लाग्नुस् भन्नुभयो। अन्य रणनीतिबारे पनि केही छलफल भयो,’ उनले भनिन्।

त्यस्तै उम्मेदवार राजुनाथ पाण्डेले पनि निर्वाचन क्षेत्रमा भइरहेको गतिविधिबारे जानकारी गराउन शाहसँग भेट गरिएको बताए। भेटमा चुनावी रणनीतिबारे छलफल भएको उनको भनाइ छ।

फागुन २१ गते प्रतिनिधिसभा सदस्य निर्वाचन हुँदैछ। रास्वपाका वरिष्ठ नेता शाह भने झापा–५ बाट उम्मेदवारी दिएका छन्।

२०८२ माघ ११ गते आइतवार १७:११ बजे प्रकाशित