काठमाडौँ । गृहमन्त्री ओमप्रकाश अर्यालले सामाजिक सञ्जालमार्फत भ्रम, तथ्यहीन तथा अमर्यादित सामग्री फैलाउनेहरूलाई माथिल्लो तहको आदेश कुर्नु नपरी तत्काल कानुनी दायरामा ल्याउन निर्देशन दिएका छन्।

आइतबार गृहमन्त्री अर्याल नेतृत्वको सरकारी टोलीले नेपाल प्रहरीको साइबर ब्युरो तथा काठमाडौँको हनुमानढोकास्थित पुरानो प्रहरी परिसरको जीर्ण भवनको स्थलगत अवलोकन गरेको हो। टोलीमा गृह सचिव राजकुमार श्रेष्ठ, नेपाल प्रहरीका प्रहरी महानिरीक्षक दानबहादुर कार्की तथा गृह मन्त्रालयका सुरक्षा तथा समन्वय महाशाखा प्रमुख एवं सहसचिव आनन्द काफ्ले सहभागी थिए।

भोटाहिटीस्थित साइबर ब्युरो कार्यालयमा पुगेर गृहमन्त्री अर्यालले आसन्न प्रतिनिधिसभा सदस्य निर्वाचनलाई मर्यादित र शान्तिपूर्ण रूपमा सम्पन्न गर्न साइबर ब्युरोको भूमिका अत्यन्त महत्त्वपूर्ण हुने बताए। उनले सामाजिक सञ्जालमार्फत फैलिन सक्ने भ्रामक, मिथ्या तथा कानुनले वर्जित सामग्रीको सूक्ष्म निगरानी गर्न र अवैधानिक तथा दर्ताबिनै सञ्चालन भइरहेका सामाजिक सञ्जालको नियमनमा सक्रिय हुन निर्देशन दिए।

साइबर ब्युरोका प्रमुख प्रहरी नायब महानिरीक्षक नविन्द अर्यालबाट सेवा प्रवाहबारे जानकारी लिएपछि गृहमन्त्रीले निर्वाचन अवधिमा ब्युरोलाई अझ सक्रिय बनाउँदै सामाजिक सञ्जालमा स्वत:स्फूर्त रूपमा फैलिने भ्रम र अवैधानिक सामग्रीमाथि तत्काल कारबाही गर्नुपर्नेमा जोड दिए।

समाजमा सामाजिक सद्भावमा खलल पुग्ने गरी सामाजिक सञ्जालको दुरुपयोग हुन नदिन तथा फागुन २१ गते हुने निर्वाचनको सकारात्मक माहोल कायम राख्न थप तदारुकताका साथ काम गर्न उनले निर्देशन दिएका छन्।

२०८२ माघ ११ गते आइतवार १७:१३ बजे प्रकाशित