दमक। राष्ट्रिय स्वतन्त्र पार्टी (रास्वपा)का वरिष्ठ नेता तथा काठमाडौँ महानगरका निवर्तमान मेयर बालेन्द्र शाहले काठमाडौँ  महानगरमा आफू मेयर हुँदा विदेशी चलखेल तथा हस्तक्षेप रहने गरेको खुलाएको छन् ।

राजधानीको मेयरमा प्रधानमन्त्रीभन्दा कम हैसियत नहुने जनाउँदै उनले यस्तो खुलाएको हो ।झापा क्षेत्र नं. ५ का प्रतिनिधि सभा सदस्य उम्मेद्वार रहेका शाहले सोमबार बिहान झापाको दमकमा घरदैलो कार्यक्रममा बोल्दै अन्तर्राष्ट्रिय समुदायको चलखेल महानगरमा धेरै नै रहेको दाबी गरे।

अन्तर्राष्ट्रिय चलखेलको विषयमा एक मतदाताले प्रश्न गरेपछि उनले त्यो आफूले भोगेको बताए। कसरी र कसले चलखेल गर्‍यो भन्ने उनले खुलाएनन् ।

“काठमाडौँ महानगरमा अन्तर्राष्ट्रिय चलखेल कति भएको थियो त्यो तपाई कल्पना पनि गर्न सक्नुहुन्न,” शाहले भने। फोहोर व्यवस्थापनमा समेत अन्तर्राष्ट्रिय चलखेल रहेको शाहले बताए।

फोहोर व्यवस्थापनको विषयमा धेरै नै हस्तक्षेप भएको शाहको भनाइ छ । त्यो समयको विषयमा धेरैलाई जानकारी भएको शाह बताउछन्।

पछिल्लो समयमा अन्तर्राष्ट्रिय चलखेल बढेको र यो निर्वाचनमा पनि त्यो प्रभाव देखिएको भन्दै मतदाताले गुनासो गर्न थालेका छन् । रास्वपाले आफ्ना वरिष्ठ नेता शाहलाई निर्वाचनपछिको प्रधानमन्त्रीको रूपमा प्रस्ताव गरेको छ ।

२०८२ फागुन ४ गते सोमवार १७:३४ बजे प्रकाशित