काठमाडौँ । आगामी प्रतिनिधिसभा सदस्य निर्वाचन, २०८२ लाई शान्तिपूर्ण र भयरहित वातावरणमा सम्पन्न गर्न देशभरको सुरक्षा व्यवस्था मजबुत पारिएको दानबहादुर कार्की ले बताएका छन्।

निर्वाचन सुरक्षा व्यवस्थापनबारे जानकारी दिँदै उनले चुनाव बिथोल्ने वा उच्छृङ्खल गतिविधि गर्ने जोकोहीमाथि कडा रूपमा बल प्रयोग गरिने चेतावनी दिएका छन्।

गृह मन्त्रालयको नेतृत्वमा निर्वाचन सुरक्षाका लागि नेपाली सेना, नेपाल प्रहरी, सशस्त्र प्रहरी बल र राष्ट्रिय अनुसन्धान विभाग सम्मिलित एकीकृत सुरक्षा योजना प्रभावकारी रूपमा कार्यान्वयनमा रहेको कार्कीले बताए।

उनका अनुसार चारै सुरक्षा निकायले आ–आफ्नो स्थानबाट सूचना संकलन, विश्लेषण र सम्भावित चुनौतीहरूको मूल्यांकन गर्दै संयुक्त रूपमा काम गरिरहेका छन्। देशभरका सबै मतदान केन्द्रमा सुरक्षाकर्मी पुगिसकेको र हिमाली तथा उच्च पहाडी जिल्लामा कर्मचारी तथा सुरक्षा व्यवस्थापनको लागि मौसम पूर्वानुमान महाशाखासँग समन्वयमा काम भइरहेको छ।

अत्यधिक चिसो र दुर्गम स्थानहरूमा निर्वाचन सामग्री, कर्मचारी र सुरक्षाकर्मी पुर्‍याउन हेलिकप्टरको व्यवस्था समेत मिलाइएको उनले जानकारी दिए।

निर्वाचनको मौन अवधिको पालना आवश्यक भएको भन्दै कार्कीले राजनीतिक दल, उम्मेदवार र सबै सरोकारवालालाई चेतावनी दिए। सामाजिक सञ्जालमा भ्रामक सूचना फैलाउने वा आचारसंहिता उल्लंघन गर्ने कार्य तत्काल कानुनी दायरामा ल्याइने, र सुरक्षा निकायले यस्ता गतिविधि नियन्त्रणका लागि सूक्ष्म निगरानी राखेको उनले बताए।

निर्वाचनको दिन सुरक्षा व्यवस्था अत्यन्तै कडा हुने र मतदान केन्द्रमा धम्की, डर वा बुथ कब्जा गर्ने जस्ता गतिविधि भए तत्काल कानुनी रूपमा बल प्रयोग गरिने अधिकार सुरक्षाकर्मीलाई दिइएको कार्कीले स्पष्ट पारे। प्रमुख जिल्ला अधिकारीको नेतृत्वमा जिल्लाको समग्र सुरक्षा व्यवस्थापन हुने र आवश्यक परेमा सशस्त्र प्रहरी तथा नेपाली सेनाको पनि परिचालन गरिने व्यवस्था मिलाइएको छ।

आईजी कार्कीले आम मतदातालाई अपिल गर्दै डर, त्रास वा धम्कीको डर बिना आफ्नो अमूल्य मताधिकार प्रयोग गर्न आग्रह गरेका छन्। मतदान केन्द्रसम्म पुग्न र सुरक्षित रूपमा फर्किन सबै नागरिकलाई भरोसा गरिएको बताए।

२०८२ फागुन २० गते बुधवार १९:०७ बजे प्रकाशित