काठमाडौं ।उज्यालो नेपाल पार्टीका अध्यक्ष कुलमान घिसिङले सरकारले विद्युत्को महसुल घटाउनुपर्ने समयमा उल्टै भ्याट थपेर महँगी बढाउने नीति लिएको आरोप लगाएका छन्।

शुक्रबार उज्यालो नेपाल पार्टीको युवा तथा विद्यार्थी विभागले आयोजना गरेको कार्यक्रममा बोल्दै घिसिङले आफू नेपाल विद्युत् प्राधिकरणमा कार्यरत रहँदा घाटामा रहेको प्राधिकरणको विद्युत् महसुल तीन पटक गरी २५ प्रतिशत घटाएको स्मरण गरे। उनले महसुल कटौतीबाट करिब २५ अर्ब रुपैयाँ बराबरको राहत पुगेको दाबी गरे।

‘२५ अर्ब रुपैयाँ बराबरको विद्युत् महसुल घटाउँदा पनि प्राधिकरण नाफामा आयो। घाटामा रहेको प्राधिकरणको महसुल घटाउँदा समेत नाफा कमाउन सफल भयौं,’ उनले भने।

घिसिङले नेपालमा हाल धेरै जलविद्युत् आयोजना निर्माण भइरहेकाले आगामी दिनमा विद्युत् उत्पादन बढ्दै जाने र विद्युत् थप सस्तो हुनुपर्ने बताए। तर, सरकारले विद्युत् महसुल घटाउनेतर्फ ध्यान दिनुको सट्टा थप कर लगाउने नीति लिएको उनको आरोप छ।

‘हामीले त अब विद्युत्मा पनि भ्याट लगाउने भयौं। भारतमा समेत विद्युत्मा भ्याट छैन, तर यहाँ सरकारले पाँच प्रतिशत भ्याट लगाएको छ,’ उनले भने, ‘यसले औद्योगिक उत्पादनको लागत बढाउँछ र अन्तत: उपभोक्ताले महँगीको भार बेहोर्नुपर्ने अवस्था सिर्जना हुन्छ।’

२०८३ जेठ २२ गते शुक्रवार १७:५९ बजे प्रकाशित