बझाङमा जीप दुर्घटना : ३ जनाको मृत्यु, १३ घाइते, ७ जनाको अवस्था गम्भीर
धनगढी। बझाङको केदारस्यूँ गाउँपालिका–७ स्थित सुङगरे क्षेत्रमा भएको जीप दुर्घटनामा तीन जनाको मृत्यु भएको छ भने १३ जना घाइते भएका छन्।
जिल्ला प्रहरी कार्यालय बझाङका अनुसार दुर्घटनामा ज्यान गुमाउनेहरूमा केदारस्यूँ गाउँपालिका–७ की बिमला धामी, दुर्गाथली–६ की ६० वर्षीया केलादेवी महत र ६० वर्षीय चक्र महत रहेका छन्।
प्रहरीका अनुसार दुर्घटनामा घाइते हुनेको संख्या १३ पुगेको छ। घाइतेमध्ये सात जनाको अवस्था गम्भीर रहेको छ भने अन्य छ जनाको अवस्था मध्यम रहेको जनाएको छ।
घाइतेहरूको उद्धार तथा उपचारका लागि हेलिकप्टर परिचालन गरिएको प्रहरीले जनाएको छ। दुर्घटनाग्रस्त जीप सडकबाट करिब ३०० मिटर तल खसेको बताइएको छ।
दुर्घटनाको कारणबारे प्रहरीले अनुसन्धान गरिरहेको छ।
२०८३ असार २७ गते शनिवार १९:५३ बजे प्रकाशित
