काठमाडौं । भौतिक पूर्वाधार तथा यातायातमन्त्री सुनिल लम्सालले काठमाडौं महानगरपालिकाका नगर प्रहरीलाई मनोबल कमजोर नबनाउन आग्रह गरेका छन्।

मंगलबार प्रतिनिधिसभाको बैठकमा बोल्दै मन्त्री लम्सालले मुगुका गणेश नेपालीको आत्मदाह घटनापछि सडकमा नगर प्रहरीको उपस्थिति कम भएकोप्रति संकेत गर्दै उनीहरूको मनोबल उच्च राख्न आग्रह गरेका हुन्।

“काठमाडौं महानगरपालिकाका नगर प्रहरीहरू, मनोबल नघटाउनुहोस्,” उनले भने, “तपाईंहरूकै कारण धेरै एम्बुलेन्स समयमै अस्पताल पुगेका छन्। धेरै नागरिकको ज्यान जोगिएको छ।”

मन्त्री लम्सालले नगर प्रहरीको सक्रियता घट्दा सडक व्यवस्थापनमा असर परेको उल्लेख गर्दै त्यसका कारण थप मानवीय क्षति भएको हुन सक्ने आशंका पनि व्यक्त गरे।

उनले नगर प्रहरीले ट्राफिक व्यवस्थापन, आपत्कालीन सेवाको सहज आवागमन र सार्वजनिक व्यवस्थापनमा महत्त्वपूर्ण भूमिका निर्वाह गर्दै आएको उल्लेख गर्दै आफ्नो जिम्मेवारी निरन्तर निभाउन आग्रह गरे।

२०८३ असार ३० गते मंगलवार १७:१८ बजे प्रकाशित