काठमाडौँ। एलपी ग्यासको कालोबजारी रोक्न र आयल निगमको घाटा अन्त्य गर्न प्रविधिमा आधारित ट्र्याकिङ प्रणाली तत्काल लागू गर्न सांसद रहबर अन्सारीले माग गरेको छन्

उद्योग, वाणिज्य, श्रम तथा उपभोक्ता हित समितिका सभापति एवं सांसद अन्सारीले संसदीय समितिको बैठकमा बोल्दै देशभर रहेका करिब एक करोड ७५ लाख एलपी ग्यास सिलिन्डरको म्यापिङ र ट्र्याकिङ गर्न सरकार तथा नेपाल आयल निगमसँग आग्रह गरे। भारतबाट ग्यासको पर्याप्त आपूर्ति भइरहे तापनि सिलिन्डर लुकाउने र कालोबजारी गर्ने प्रवृत्तिका कारण बजारमा कृत्रिम अभाव देखिएको उनको भनाइ थियो।

समस्या समाधानका लागि आरएफआईडी, बारकोड तथा घरायसी बिजुली मिटरसँग जोडेर कुन सिलिन्डर कुन डिपो, डिलर वा उपभोक्ताकहाँ छ भन्ने स्पष्ट तथ्याङ्क राख्ने प्रविधि लागू गर्न उनले सुझाव दिए।

प्रशासनिक सुस्तताको आलोचना गर्दै सभापति अन्सारीले साना उपभोक्ताका लागि ५ किलोग्राम र ठूला उद्योग तथा होटलका लागि ५० देखि ४५० किलोग्रामसम्मका फरक–फरक क्षमताका ग्यास सिलिन्डर प्रयोगमा ल्याउन आग्रह गरे। हाल पाँचतारे होटल तथा ठूला उद्योगले समेत घरायसी प्रयोजनका लागि दिइने १४.२ किलोग्रामको अनुदानित ग्यास प्रयोग गरिरहेकाले राज्यलाई प्रतिसिलिन्डर ९३८ रुपैयाँसम्म घाटा भइरहेको उनले बताउनुभयो। यसबाट मासिक करिब ६५ करोड रुपैयाँ (वार्षिक साढे सात अर्ब रुपैयाँभन्दा बढी)नोक्सानी भइरहेको उनले खुलासा गरे।

सांसदहरूलाई जनता र उपभोक्ताको मात्र दबाब रहेको उल्लेख गर्दै उनले सम्बद्ध मन्त्री तथा सरोकारवाला निकायलाई २४–२४ घण्टामा प्रगति विवरण लिन, सिर्जनशील (इनोभेटिभ) फाइल रोक्ने प्रवृत्ति अन्त्य गर्न र साना तथा विपन्न वर्गलाई सहुलियत दिँदै व्यावसायिक प्रयोजनका लागि छुट्टै दररेट कायम गर्न जोडदार माग गरे।

२०८३ साउन १९ गते मंगलवार १७:३२ बजे प्रकाशित