बढ्यो अण्डाको मूल्य, प्रतिक्रेट ५६० रुपैयाँ पुग्यो
चितवन । बजारमा अण्डाको माग बढेसँगै व्यवसायीले अण्डाको समर्थन मूल्य बढाएका छन्। नेपाल लेयर्स कुखुरापालक सङ्घले मंगलबारदेखि लागू हुने गरी अण्डाको नयाँ समर्थन मूल्य सार्वजनिक गरेको हो।
सङ्घका अनुसार एक्सएल अण्डाको मूल्य प्रतिक्रेट ५६० रुपैयाँ पुगेको छ। त्यस्तै ठूलो अण्डा प्रतिक्रेट ५४५ रुपैयाँ र मिडियम अण्डा प्रतिक्रेट ५०० रुपैयाँ कायम गरिएको छ।
सानो अण्डाको मूल्य भने प्रतिपेटी ३ हजार रुपैयाँ तोकिएको छ। एउटा पेटीमा सात क्रेट अर्थात् २१० वटा अण्डा हुन्छन्।
सङ्घका अध्यक्ष विनोद पोखरेलका अनुसार बर्डफ्लुको सङ्क्रमण घट्नुका साथै यसअघि रोगका कारण ठूलो संख्यामा कुखुरा मरेपछि अण्डाको उत्पादन घटेको छ। उत्पादन घटेपछि बजारमा मागअनुसार अण्डा उपलब्ध हुन नसक्दा मूल्य बढेको उनले बताए।
‘फार्मले दिएको दरका आधारमा समर्थन मूल्य जारी गरिएको हो,’ पोखरेलले भने।
तर बजारमा अण्डाको मूल्य बढे पनि किसानले अझै उत्पादन लागतअनुसारको मूल्य पाउन नसकेको व्यवसायीहरूको भनाइ छ।
पोखरेलका अनुसार एउटा अण्डा उत्पादन गर्न औसत १९ रुपैयाँ १२ पैसा लागत पर्छ। यस आधारमा एउटा प्रतिक्रेट अण्डाको उत्पादन लागत ५७३ रुपैयाँ ६० पैसा पुग्छ।
यस हिसाबले अहिले कायम गरिएको एक्सएल अण्डाको समर्थन मूल्य प्रतिक्रेट ५६० रुपैयाँ हुँदा पनि किसानले लागतभन्दा कम मूल्यमा अण्डा बिक्री गर्नुपर्ने अवस्था रहेको देखिन्छ।
रोगले घटायो उत्पादन, किसान थप संकटमा
बर्डफ्लुको सङ्क्रमणका कारण पछिल्लो समय कुखुरापालन व्यवसायले ठूलो क्षति व्यहोर्नुपरेको व्यवसायीहरू बताउँछन्।
रोगका कारण कतिपय किसानका कुखुरा मरे भने बाँचेका कुखुराबाट उत्पादन हुने अण्डाले पनि लागतअनुसारको मूल्य नपाउँदा किसान थप मारमा परेका थिए।
लामो समयसम्म उत्पादन लागतभन्दा कम मूल्यमा अण्डा बिक्री गर्नुपरेपछि केही किसान कुखुरापालन व्यवसायबाटै विस्थापित हुन थालेका छन्।
व्यवसायीहरूका अनुसार पछिल्ला वर्षमा कुखुरामा देखिने रोग, उत्पादनमा आएको कमी र बजार मूल्यमा हुने उतारचढावका कारण किसान बैंकको ऋणमा निर्भर हुनुपर्ने अवस्था बढेको छ।
अहिले उत्पादन घटेका कारण अण्डाको माग बढेको भए पनि यसबाट किसानले वास्तविक लाभ पाउने अवस्था अझै बनिसकेको छैन।
बजारमा मूल्य बढ्दा उपभोक्ताले महँगो अण्डा किन्नुपर्ने अवस्था आएको छ भने किसानले उत्पादन लागत धान्न नसकेको गुनासो गरिरहेका छन्। यसले अण्डाको मूल्य शृङ्खलामा किसानदेखि उपभोक्तासम्मको असन्तुलन फेरि सतहमा ल्याएको छ।
२०८३ साउन २६ गते मंगलवार १७:०४ बजे प्रकाशित
