काठमाडौँ। काठमाडौँ उपत्यकामा एलपी ग्यासको अभाव चुलिँदा उपभोक्ताले महँगो मूल्य तिर्नुपर्ने बाध्यता खेपिरहेका छन् । घण्टौँ लाइन बसेर पनि ग्यास नपाउने अवस्था बनेपछि अभावसँगै कालोबजारीको समस्या थपिएको हो ।

भोटेकोशीको हिमबाढी र पृथ्वी राजमार्गको कृष्णभिरमा गएको पहिरोका कारण ग्यास आपूर्ति प्रभावित भएको छ । सामान्य अवस्थामा दैनिक ३५ हजारदेखि ४० हजार सिलिन्डर आवश्यक पर्ने उपत्यकामा अहिले औसत ३० हजार सिलिन्डर मात्र भित्रिइरहेको नेपाल आयल निगमले जनाएको छ ।

आपूर्ति कम भएपछि केही व्यवसायीले तोकिएको मूल्यभन्दा बढीमा ग्यास बिक्री गरेको पाइएको छ । मूलपानीस्थित अनिल खाद्य किराना पसलले सुगम ग्यास प्रतिसिलिन्डर दुई हजार छ सय रुपियाँमा बिक्री गरेको प्रमाण भेटिएपछि वाणिज्य, आपूर्ति तथा उपभोक्ता संरक्षण विभागले तीन लाख रुपियाँ जरिबाना गरेको छ ।

विभागले ग्यास उद्योग, विक्रेता र डिपोमा अनुगमन तीव्र बनाएको जनाएको छ । बिहीबार १० वटा उद्योग तथा डिपोमा गरिएको अनुगमनका क्रममा अधिकांशमा ग्यास नआएको र सयौँ उपभोक्ता लाइनमा रहेको पाइएको थियो ।

कृष्णभिरमा सडक अवरुद्ध भएपछि व्यवसायीले हेटौँडा, वीरगन्ज, नवलपरासी र धनुषालगायतका स्थानबाट वैकल्पिक मार्ग हुँदै ग्यास ल्याइरहेका छन् । ढुवानी लागत बढेको भन्दै उद्योग सङ्घले निगमले तोकेको मूल्यमा थप १०५ रुपियाँ ३८ पैसा जोडेर बिक्री गर्न भनेको छ ।

२०८३ भदौ २६ गते शुक्रवार १०:२९ बजे प्रकाशित