धादिङ बस दुर्घटना: मृत्यु हुनेको संख्या १९ पुग्यो, ९ जनाको सनाखत
काठमाडौं । पोखराबाट काठमाडौं आउँदै गरेको बस धादिङमा दुर्घटना हुँदा मृत्यु हुनेको संख्या १९ पुगेको छ। मृतकमध्ये ९ जनाको सनाखत भएको छ भने अन्यको पहिचान खुल्ने क्रम जारी रहेको प्रहरीले जनाएको छ।
जिल्ला प्रहरी कार्यालय धादिङका अनुसार गएराति धादिङको बेनिघाट रोराङ गाउँपालिका–चरौंदी नजिक भैंसेडाँडा क्षेत्रमा ग।२ ख। १२३१ नम्बरको बस दुर्घटनामा परेको हो। दुर्घटनाको कारणबारे विस्तृत अनुसन्धान भइरहेको छ।
दुर्घटनामा घाइते भएका २५ जनाको काठमाडौंका विभिन्न अस्पतालमा उपचार भइरहेको छ। प्रहरीका अनुसार १४ जनाको ट्रमा सेन्टरमा, १० जनाको नेशनल अस्पताल कलंकीमा र एक जनाको त्रिवि शिक्षण अस्पताल महाराजगञ्जमा उपचार भइरहेको छ।
यसैबीच, गृह मन्त्रालयले धादिङ बस दुर्घटनाको छानबिन गर्न समिति गठन गर्ने निर्णय गरेको छ। समितिले दुर्घटनाको कारण र जिम्मेवारीबारे छानबिन गर्ने जनाइएको छ।
२०८२ फागुन ११ गते सोमवार १७:०१ बजे प्रकाशित
