काठमाडौँ । सरकारले १२ वटा ट्रेड युनियनको दर्ता खारेज गरेको छ।  श्रम तथा व्यवसायजन्य सुरक्षा विभागले बुधबार गरेको निर्णयअनुसार निजामती सेवा ऐन, २०४९ अन्तर्गत दर्ता भएका ८ वटा र स्वास्थ्य सेवा ऐनअन्तर्गत दर्ता भएका ४ वटा ट्रेड युनियनको दर्ता खारेज गरिएको हो।

यसअघि सरकारले केही नेपाल ऐन संशोधन गर्न बनेको अध्यादेशमार्फत दलगत आधारमा रहेका निजामती कर्मचारी संगठन तथा राष्ट्रियस्तरका ट्रेड युनियन खारेज गर्ने व्यवस्था गरेको थियो। सोही व्यवस्थाअनुसार विभागको पञ्जिकाधिकारीको निर्णयबाट ती युनियनहरूको दर्ता खारेज गरिएको जनाइएको छ।

दर्ता खारेज गरिएका निजामती क्षेत्रका संगठनमा नेपाल निजामती कर्मचारी संगठन, नेपाल निजामती कर्मचारी युनियन, नेपाल राष्ट्रिय निजामती कर्मचारी संगठन, नेपाल मधेसी निजामती कर्मचारी मञ्च, नेपाल स्वास्थ्यकर्मी संघ, मधेसी स्वास्थ्यकर्मी फोरम नेपाल, एकीकृत सरकारी कर्मचारी संगठन नेपाल र स्वतन्त्र राष्ट्रसेवक कर्मचारी संगठन नेपाल रहेका छन्।

त्यस्तै स्वास्थ्य सेवा ऐनअन्तर्गत दर्ता भएका नेपाल स्वास्थ्यकर्मी युनियन, स्वास्थ्यकर्मी युनियन नेपाल, राष्ट्रिय स्वास्थ्यकर्मी संघ नेपाल र राष्ट्रिय प्रगतिशील स्वास्थ्यकर्मी संगठनको दर्ता पनि खारेज गरिएको छ।

सरकारको यो निर्णयसँगै सरकारी सेवामा ट्रेड युनियन संरचना पुनःव्यवस्थित हुने अपेक्षा गरिएको छ।

२०८३ वैशाख २३ गते बुधवार २०:०९ बजे प्रकाशित