काठमाडौं । काठमाडौं जिल्ला अदालतले रवि लामिछाने विरुद्धको स्वर्णलक्ष्मी सहकारी ठगी प्रकरणमा साउन २१ गतेका लागि साधारण तारिख तोकेको छ।

अदालतका सूचना अधिकारी शिव खतिवडा का अनुसार उक्त दिन सुनुवाइ नहुने भए पनि प्रतिवादीलाई अदालतमा उपस्थित हुनुपर्नेछ।

यसअघि जिल्ला अदालतका न्यायाधीश आत्मदेव जोशी को इजलासले लामिछानेमाथि लगाइएको संगठित अपराधसम्बन्धी अभियोग फिर्ता लिन सरकारलाई अनुमति दिएको थियो। अदालतको आदेशसँगै अब लामिछानेसहित ३९ प्रतिवादीविरुद्ध सहकारी ठगीसम्बन्धी मुद्दा मात्र कायम रहेको छ।

अदालतले मुलुकी फौजदारी कार्यविधि संहिता, २०७४ को दफा ३६ अनुसार अभियोगपत्र संशोधन गर्न अनुमति दिएको हो। यद्यपि, सहकारी ठगीसम्बन्धी आरोप भने यथावत् रहेको छ।

लामिछानेसँगै यसअघि अदालतमा हाजिर भएका अन्य प्रतिवादीलाई पनि साउन २१ गतेकै तारिख तोकिएको छ। मुद्दाका अर्का प्रतिवादी पूर्वडीआईजी छविलाल जोशी बञ्जाडे बुधबार तारिख बुझ्न अदालतमा उपस्थित भएका थिए। लामिछाने भने हाल चितवनमा जारी रास्वपाको महाधिवेशनमा सहभागी छन्।

यो मुद्दा सुमन खनाल लगायतको जाहेरीका आधारमा नेपाल सरकार वादी भएर दायर गरिएको हो। तत्कालीन महान्यायाधिवक्ता सविता भण्डारी बराल को निर्णयअनुसार जिल्ला सरकारी वकिलको कार्यालय काठमाडौंले अभियोगपत्र संशोधनका लागि निवेदन दिएको थियो।

सुरुमा लामिछानेको हकमा मात्रै मुद्दा संशोधन गर्ने निर्णय भएको थियो। तर त्यसको व्यापक आलोचना भएपछि सबै प्रतिवादीको हकमा ठगीसम्बन्धी अभियोग कायम राख्दै संगठित अपराधतर्फको अभियोग हटाउने निर्णय गरिएको थियो।

यससँगै स्वर्णलक्ष्मी सहकारी प्रकरणमा अब अदालतको सुनुवाइ सहकारी ठगीसम्बन्धी आरोपमा केन्द्रित हुने भएको छ।

२०८३ असार ११ गते बिहीवार १९:३४ बजे प्रकाशित