काठमाडौं । नेपाली कांग्रेसका सभापति गगनकुमार थापाले संविधान संशोधन आवश्यक भए पनि त्यसलाई हचुवाको भरमा अघि बढाउँदा सामाजिक तनाव बढ्न सक्ने बताएका छन् ।

पार्टी संयन्त्रले सरकारका सय दिनबारे गरेको समीक्षा कार्यक्रममा बोल्दै थापाले यस्तो बताएका हुन् ।

प्रदेश नाम, संविधानसँग सम्बन्धित मुद्दा लगायत संवेदनशील विषयमा सरकारका मन्त्रीहरूले हल्का ढंगले अभिव्यक्ति दिने गरेको बताए। “संविधान संशोधन गर्नुपर्ने विषय छन्, तर यसरी हचुवामा होइन,” उनले भने।

वर्तमान सरकारका मन्त्रीहरूले संवेदनशील विषयमा दिएका अभिव्यक्तिप्रति आपत्ति जनाएका छन्। उनले मन्त्रीहरूका फरक–फरक र असंयमित भनाइले सरकार सञ्चालनमै अस्थिरता देखिएको टिप्पणी गरेका छन्।

उनका अनुसार एउटै सरकारभित्रका मन्त्रीहरूबीच नै एकरूपता नदेखिनु चिन्ताको विषय हो। “एउटाले एउटा कुरा बोलिदिनुभएको छ, अर्कोले अर्को थपिदिनुभएको छ, तेस्रोले फेरि खारेज गरिदिनुभएको छ,” भन्दै उनले सरकारभित्र समन्वयको अभाव रहेको संकेत गरे।

थापाले संविधान निर्माणका क्रममा भएका संवेदनशील सहमति र सरोकारलाई सरकारले पर्याप्त ध्यान नदिएको आरोप पनि लगाए। यस्ता विषयलाई हल्का रूपमा लिनु उपयुक्त नहुने उनको भनाइ थियो।

भाषा, समावेशिता र अधिकारजस्ता विषय अत्यन्त संवेदनशील हुने भएकाले जिम्मेवार ढंगले मात्रै व्यवहार गर्नुपर्नेमा उनले जोड दिए। विविधतालाई सम्बोधन गर्ने विषयलाई हल्का रूपमा लिनु गलत हुने भन्दै उनले सरकारलाई सचेत रहन आग्रह गरे।

२०८३ असार २१ गते आइतवार १८:२८ बजे प्रकाशित