काठमाडौं । कानुन, न्याय तथा संसदीय मामिलामन्त्री अनिलकुमार सिन्हाले आगामी निर्वाचनमा जनताप्रति उत्तरदायी र काम गर्न सक्ने जनप्रतिनिधि मात्र चुन्न आग्रह गरेका छन्।

राष्ट्रिय मानवअधिकार आयोगले बिहीबार आयोजना गरेको कार्यक्रममा मन्त्री सिन्हाले एउटा कानुन बनाउन पाँच वर्ष र त्यसको प्रत्यायोजित विधायन बनाउन अर्को पाँच वर्ष लगाउने जनप्रतिनिधिलाई पुन: भोट दिन नहुने बताएका हुन्।

‘यस्ता प्रतिनिधिलाई फेरि भोट हाल्न जाँदा हात काम्नुपर्छ,’ उनले भने, ‘अब जनतालाई डेलिभर गर्न सक्ने र जनतासँग जोडिन सक्ने प्रतिनिधि चुन्ने समय आएको छ।’

जेन–जी आन्दोलनले योग्य जनप्रतिनिधि छान्ने अवसर दिएको उल्लेख गर्दै उनले सरकारले समयमै निर्वाचन गर्न प्रतिबद्ध रहेको बताए। ‘५ जनाले ताली बजाउ भनेपछि ताली बजाएर कानुन पारित गर्ने व्यक्तिलाई चुनेर पठाइयो भने १० वर्षपछि पनि हामी यहीँ फर्केर आइरहेका हुन्छौँ,’ उनले भने।

मन्त्री सिन्हाले आवश्यकताका आधारमा प्राथमिकता दिएर कानुन निर्माण गर्नुपर्नेमा जोड दिँदै बाझिने खालका कानुन बनाउन नहुने बताए।

२०८२ पुस २४ गते बिहीवार १७:०४ बजे प्रकाशित