काठमाडौं । फागुन २१ गते हुने प्रतिनिधि सभा निर्वाचनका लागि २२ वटा कम्युनिष्ट र समाजवादी पार्टी तथा समूहहरू मिलेर बनेको नवगठित नेपाली कम्युनिस्ट पार्टी (नेकपा) ले बिहीबार आफ्नो चुनावी अपिल सार्वजनिक गरेको छ।

पार्टीका संयोजक पुष्पकमल दाहाल प्रचण्ड र सहसंयोजक माधव कुमार नेपाल ले हस्ताक्षरित अपिलमा जनता ‘तारा’ चुनाव चिन्हमा मतदान गर्न आह्वान गरेका छन्। पार्टीले आफ्नो मुख्य नाराका रूपमा “व्यवस्था बदल्यौं, अब अवस्था बदल्छौँ” सार्वजनिक गरेको छ।

मुख्य चुनावी मुद्दा

सुशासन र पारदर्शिता: भ्रष्टाचारविरुद्ध शून्य सहनशीलता, सार्वजनिक पदधारीको सम्पत्ति छानबिन र भ्रष्ट सम्पत्ति राष्ट्रियकरण।

आर्थिक रूपान्तरण: आयातमा आधारित अर्थतन्त्र घटाउँदै कृषि, उद्योग, जलस्रोत र पर्यटनमा रोजगारी सिर्जना, दलाल पुँजीवाद र कालोबजार नियन्त्रण।

सामाजिक समावेशीकरण: छुवाछुत, छाउपडी, बोक्सी प्रथा, जातीय र लैंगिक विभेदको अन्त्य।

संविधान र लोकतन्त्र: संविधानको समीक्षा र आवश्यक परिमार्जन, लोकतान्त्रिक गणतन्त्र र समावेशी प्रणाली सुदृढ।

निर्वाचन सुधार: खर्चिलो र जटिल प्रणालीको सट्टा सरल, कम खर्चिलो प्रणाली अपनाउने।

राष्ट्रिय स्वाधीनता: विदेशी हस्तक्षेप अस्वीकार, असमान सन्धि खारेज, अतिक्रमित भूमि फिर्ता।

पार्टीले अपिलमा स्पष्ट पारेको छ कि यस निर्वाचनमार्फत नयाँ व्यवस्थाको स्थापना गर्दै देशको सामाजिक, आर्थिक र राजनीतिक रूपान्तरणमा योगदान दिने लक्ष्य राखिएको छ।

२०८२ फागुन १४ गते बिहीवार १८:४७ बजे प्रकाशित