गोरखा । राष्ट्रिय स्वतन्त्र पार्टीका सभापति रवि लामिछानेले अहिलेको चुनावलाई ‘महाभारत’सँग तुलना गर्दै कौरव र पाण्डव को हुन् भन्ने छुट्याउन मतदातालाई आग्रह गरेका छन्।

गोरखाको पालुङ्टारमा आयोजित चुनावी सभालाई सम्बोधन गर्दै उनले आफूहरू जनताबाट पाएको विश्वास जोगाउन अत्यन्तै सचेत रहेको बताए।

“यो महाभारत हो, यहाँ को कौरव हुन्, को पाण्डव हुन् तपाईंहरूले छुट्याउनुहोस्,” उनले भने, “हामी को हौँ भन्ने कुरा हामीले होइन, तपाईंहरूले भन्नुहुने हो। तर यसपटक परिवर्तनको जबर्जस्ती घण्टी बजाउनुपर्छ।”

अर्को प्रसंगमा उनले आफूले प्रधानमन्त्री पद त्यागेर जेल जीवन रोजेको दाबी गरे। “प्रधानमन्त्री त मलाई यिनले किस्तीमा राखेर दिएका थिए। तर किस्तीमा आएको प्रधानमन्त्री छोडेर कैदी हुन रोजेको मान्छे हुँ म,” उनले भने, “सम्झौता गर्ने अवसर थियो होला, तर जनतालाई धोका दिन्नँ, बरु ज्यान दिन तयार छु।”

आफूलाई कहिलेकाहीँ आफ्नै निर्णयबारे डर लाग्ने बताउँदै उनले जनताको आशा र भरोसा कमजोर पारिने हो कि, धोका दिइने हो कि भन्ने चिन्ता हुने गरेको पनि उल्लेख गरे।

२०८२ फागुन १४ गते बिहीवार १८:५० बजे प्रकाशित